Pardýbıtse qalasynda CZECH OPEN-2016 zııatkerlik oıyndar festıvali ótip jatyr (FOTO)
ASTANA. QazAqparat - Qazir Chehııanyń Pardýbıtse qalasynda CZECH OPEN-2016 zııatkerlik oıyndar festıvali ótip jatyr. Festıval baǵdarlamasynda toǵyzqumalaq, betemshe, afrıkalyk ovarı, túrik mankalasy oıyndarynan jáne toǵyzqumalaqtan kompıýterlik baǵdarlamalar arasynda halyqaralyq jarystar ótýde.
Básekeni osymen 9-shi ret Chehııadaǵy zııatkerlik festıvaldi ótkizýshiler uıymdastyryp otyr. Ovarı oıynynan ótkizilgen jarysta barlyǵy 7 elden 28 sportshy qatysýda. Atap aıtqanda - Qazaqstan, Qyrǵyzstan, Avstrııa,Túrkııa, Antıgýa Barbýda, Şveıtsarııa jáne Chehııa.
Nátıjesinde júldeli oryndardy tómendegi sportshylar jeńip aldy. 1- oryndy Saıman Trevor (Antıgýa Barbýda) enshilese , 2- oryndy Ásel Dálıeva (Qazaqstan) ıelendi, al 3- oryn taǵy bir otandasymyz Serik Aqtaevqa buıyrdy. Túriktiń mangala oıynynan ótkizilgen básekege 6 elden 38 sportshy qatysty. Bul asa tartysty ótken saıysta 1-oryndy qyrǵyzstandyq Qamshybek Qasymov jeńip alsa, 2-oryndy jerlesimiz Nurbek Qabıev qanjyǵasyna baılady. Al úzdik úshtikti taǵy bir qyrǵyzdan barǵan sportshy Anarbek Jamakeev jeńip aldy. Túriktiń mangala oıynynan jastar arasynda 1-oryndy qyrǵyzstandyq Aqylbek Qasymov, 2-oryndy túrkııalyq Ozkok Berın, al 3-oryndy chehııalyq Ondre Tsah jeńip aldy. Qazirgi ýaqytta ulttyq oıynymyz - toǵyzqumalaqtan kompıýterlik baǵdarlamalar arasyndaǵy jarys jalǵasyp jatyr. Shildeniń 16 kúni bastalǵan festıval 22 shilde kúni óz máresine jetedi.
