Parasportshy Nurdáýlet Jumaǵalı Qazaqstanǵa besinshi altyndy ákeldi

Qytaıdyń Hanjchoý qalasynda ótip jatqan Azııa para oıyndarynda qazaqstandyq júzý sheberi Nurdáýlet Jumaǵalı chempıon atandy, dep habarlaıdy Kazinform.

N.Jumaǵalı SB13 sanaty boıynsha 100 metrge brass ádisimen júzýde 1:05.92 nátıjemen máre syzyǵyn birinshi bolyp qıdy.

Ózbekstandyq Fırdavsbek Musabekov ekinshi, taǵy bir qazaqstandyq Nuralı Sovetqanov úshinshi orynǵa kóterildi.

Osylaısha, qazaqstandyqtar altyn medal sanyn 5-ke jetkizdi.

Sonymen qatar batysqazaqstandyq parataekvondoshy Marıam Sálimgereeva 65 kelige deıingi salmaqta qola júldeni jeńip aldy.

BQO dene shynyqtyrý jáne sport basqarmasynan túsken málimetke qaraǵanda, Marıam Magomedsaıdqyzy 1998 jyldyń 13 naýryzynda Reseı Federatsııasy Daǵystan Respýblıkasy Kaspıısk qalasynda dúnıege kelgen.

2015-2019 jyldary Mahachkala qalasyndaǵy Daǵystan memlekettik pedagogıkalyq ýnıversıtetiniń dene shynyqtyrý jáne tirshilik qaýipsizdik negizderi fakýltetin bitirip, joǵary bilim alǵan.

Ýnıversıtet qabyrǵasynda oqyp júrip, parataekvondo sportymen shuǵyldana bastaǵan.

2021 jyly otbasy jaǵdaıymen Batys Qazaqstan oblysy Bórli aýdany ortalyǵy Aqsaı qalasyna qonys aýdarǵan.

Bapkeri – Qazaqstannyń eńbek sińirgen jattyqtyrýshysy – Erbol Merǵalıev.

Eske sala keteıik, budan buryn Azııa para oıyndarynda Qazaqstan qorjynyna taǵy úsh medal túskenin jazǵan bolatynbyz.

Sondaı-aq paradzıýdoshy Oljas Orazalyuly Qazaqstan qorjynyna tórtinshi altyndy saldy.