Parashıýtpen sekirgen sarbazdyń ólimi: QR QK Bas shtaby kinálilerdi jazalaýǵa qatysty aıtty

NUR-SULTAN. QazAqparat – QR Qarýly Kúshteri Bas shtaby Uıymdastyrý-jumyldyrý jumystary departamentiniń bastyǵy Sáken Júsipov Aqtaýda parashıýti ashylmaı, qaza bolǵan sarbazdyń ólimine jaýapty tulǵalardy jazaǵa tartý máselesine pikir bildirdi, dep habarlaıdy QazAqparat tilshisi.

«Qorǵanys mınıstriniń tapsyrmasymen bizde áskerı qyzmettiń qaýipsizdigin qamtamasyz etetin arnaıy bólimsheler qurylǵan. Ol bólimsheler barlyq komandırmen jáne bastyqtarmen birge áskerı qyzmettiń qaýipsizdigin baqylaıdy. Bul oqıǵaǵa keler bolsaq, qazirgi ýaqytta meniń bilýimshe, tergeý amaldary júrgizilip jatyr. Onyń aıaqtalýyna baılanysty tıisti sheshim shyǵady», – dedi Sáken Júsipov búgin Ortalyq kommýnıkatsııalar qyzmeti alańynda tilshilerdiń suraǵyna jaýap bere otyryp.

Onyń aıtýynsha, áskerı qyzmetshilerdiń qaýipsizdigi eń mańyzdy másele bolyp sanalady.

«Álbette, eń birinshi kezekte merzimdi áskerı qyzmettegi sarbazdardyń qaýipsizdigi úshin alańdaımyz. Keıingi jyldary merzimdi áskerı qyzmettegi sarbazdardyń jaraqat alý jaǵdaıy azaıdy», - dedi Sáken Júsipov.

Eske sala ketsek, oqıǵa Mańǵystaý oblysynda ótken aıda bolǵan edi. Jaýyngerlik daıarlyq barysynda áskerı qyzmetshilerdiń biriniń parashıýty ashylmaı qaldy.