Parashıýt sportynan ótken Qarýly Kúshter chempıonattarynda sportshylar 460 ret sekirdi

ASTANA. QazAqparat - Klassıkalyq parashıýt sporty men toptyq akrobatıkadan ótken elimiz ben Qarýly kúshterdiń XXX ashyq chempıonatynyń qorytyndysy shyǵaryldy, dep habarlaıdy QazAqparat QR Qorǵanys mınıstrliginiń baspasóz qyzmetine silteme jasap.

Baspasóz málimetterine qaraǵanda, jarysqa 12 erler komandasy qatysty. Jarysta barlyǵy 51 sportshy, onyń ishinde 7 áıel óner kórsetti.

Klassıkalyq parashıýt sportynan Qazaqstan chempıonatynda qoný dáldigine toptyq sekirýler jasaǵan maıor Vıacheslav Loparev, aǵa serjant Aslan Tasımov jáne kishi serjant Denıs Islamovtan quralǵan parashıýt daıarlaý ortalyǵynyń komandasy jeńimpaz atandy.

Ekinshi orynda – Parashıýt daıarlaý ortalyǵynyń namysyn qorǵaǵan kishi serjant Ernazar Jaqsylyq, kishi serjant Sálim Beıbituly jáne efreıtor Mıras Seıtjaparovtardan quralǵan «Baıraqtar» komandasy turaqtady. Úshinshi oryndy quramynda Rınat Sultanov, Sergeı Joldın jáne Anton Sharafýtdınov bar Qaraǵandy oblysynyń Qazaqstan avıatsııalyq sport federatsııasy ıelendi.

El chempıonatyndaǵy qoný dáldigine jeke sekirýlerde Sergeı Joldın – altyn, Sálim Beıbituly – kúmis, Vıacheslav Loparev – qola medalmen marapattaldy.

№ 2 jattyǵýda (jeke akrobatıka) Denıs Islamov chempıon atansa, Sergeı Joldın – ekinshi, Aleksandr Sabad – úshinshi oryndardy ıelendi.

Qossaıysta (№ 1 «qoný dáldigine jeke sekirý» jáne № 2 «akrobatıkalyq fıgýralar keshenin oryndaýmen jeke sekirý» jattyǵýy) Qazaqstan Respýblıkasynyń absolıýtti chempıony ataǵyn Sergeı Joldın jeńip aldy. Al Denıs Islamov kúmis, Vıacheslav Loparev qola júldeger atandy.

Qoný dáldigine toptyq sekirýlerde quramy Rınat Sultanov, Sergeı Joldın, Anton Sharafýtdınovtan turatyn Qaraǵandy oblysynyń Qazaqstan avıatsııalyq sport federatsııasynyń komandasy Qarýly kúshterdiń chempıony atandy.

Ekinshi orynda quramynda Aleksandr Sabada, Ilıa Kıtın jáne Dmıtrıı Gerbýt bar Oral qalasynyń komandasy tur. Kishi serjant Ernazar Jaqsylyq, kishi serjant Sálim Beıbituly jáne efreıtor Mıras Seıitjaparovdan quralǵan «Baıraqtar» komandasy úshinshi orynǵa kóterildi.

Qarýly kúshter birinshiliginde qoný dáldigine jeke sekirýlerde Ilıa Kıtın jeńimpaz atandy. Sergeı Joldın – ekinshi, Denıs Islamov – úshinshi oryndardy ıelendi. Jeke akrobatıkada Denıs Islamov úzdik atansa, Sergeı Joldın – kúmis, Aleksandr Sabada – qola medaldardy jeńip aldy.

Qossaıysta upaı sany boıynsha Qarýly kúshterdiń absolıýtti chempıony ataǵyn Sergeı Joldın jeńip aldy. Denıs Islamov – kúmis, Vıacheslav Loparev – qola júldeger atandy.

Chempıonat qorytyndysy boıynsha komandalar kýboktarmen, medaldarmen, gramotalarmen jáne dıplomdarmen marapattaldy.

Aıta ketý kerek, chempıonattar joǵary uıymdastyrýshylyq deńgeıde ótti. Jarys barysynda sportshylar 460 sekirý jasady.