Parashańǵydan álem chempıony Erbol Hamıtovqa qyzmettik páter berildi

PETROPAVL. QazAqparat - Búgin Petropavlda parashańǵy sportynan álem chempıony Erbol Hamıtovqa qurmet kórsetildi, dep habarlaıdy QazAqparat oblys ákiminiń Facebook paraqshasyna silteme jasap.

Eske sala keteıik, qazaqstandyq Erbol Hamıtovtyń parashańǵydan álem chempıony atanǵanyn jazǵan edik. Ol osy jarysta taǵy eki medal jeńip aldy.

Aıta ketý kerek, bul - Qazaqstan parashańǵy sporty tarıhyndaǵy alǵashqy altyn júlde.

Qazaqstan quramasynyń sapyndaǵy jeti sportshynyń tórteýi Soltústik Qazaqstan oblysynyń ókilderi boldy.

«Jas sportshylarǵa úlgi bolyp, qaısarlyq pen tabandylyq tanytqan paraatletter men olardyń bapkerlerine alǵys bildiremin. Erbol Hamıtovtyń ata-anasy Ǵalymkereı Qusaıynov pen Ǵalııa Alpyspaevaǵa da ulyn tárbıelep, chempıon ósirgeni, ómirdegi barlyq qıyndyqtardy jeńip shyqqany úshin alǵys aıttym», - dep jazdy ákim Aıdarbek Saparov.

Marapattaý rásiminde Erbol Hamıtovke aqshalaı syıaqy men qyzmettik páterdiń kilti tapsyryldy.

Sportshylar men jattyqtyrýshylar estelik syılyqtar men alǵys hat aldy.

Foto: oblys ákiminiń baspasóz qyzmeti