«Parasatty polıtseı» baıqaýynda Soltústik Qazaqstan komandasy úzdik atandy
ІІ oryn Mańǵystaý jáne Qostanaı oblystarynan kelgen qos komandaǵa buıyrdy. Júldeli ІІІ orynǵa Qyzylorda jáne Aqmola oblystary men Kóliktegi Іshki ister departamentiniń komandalary ıe boldy. Respýblıkalyq is-sharanyń jabylý saltanatynda sóz alǵan QR Іshki ister vıtse-mınıstri, polıtsııa general-maıory Berik Bısenqulov barlyq qatysýshylardy quttyqtap, dıplomdar men baǵaly syılyqtar tabys etti.
Esterińizge sala ketsek, buǵan deıin Jetisý jerine elimizdiń barlyq óńirinen ishki ister organdary qyzmetkerleri jınalyp, «Parasatty polıtseı» komandasyn anyqtaıtyn baıqaýda óner kórsetip jatqany týraly habarlaǵanbyz.
«Parasatty polıtseı» baıqaýy memlekettik tildiń mártebesin kóterip, tilge degen qurmetti arttyrý maqsatynda uıymdastyryldy. 9-shy jyl qatarynan jalaýyn túrgen respýblıkalyq saıys qazannyń 3-5 kúnderi Almaty oblysynyń ortalyǵy Taldyqorǵan qalasynda ótti. Úzdikterdi anyqtaý úshin 21 komanda ózara baq synaǵan bolatyn.