«Parasat joly» ortalyǵynyń basshysy Aqtóbedegi jemqorlyqpen kúres jumystarymen tanysty

AQTÓBE. QazAqparat - Aqtóbe oblysynyń ákimi Ońdasyn Orazalın «Parasat joly» respýblıkalyq ortalyǵynyń basshysy, jazýshy, qoǵam qaıratkeri Sádibek Túgelmen jáne Sybaılas jemqorlyqqa qarsy is-qımyl agenttigi tóraǵasynyń keńesshisi Jazıra Jylqyshıevamen kezdesti, dep habarlaıdy QazAqparat tilshisi.

Kezdesý kezinde Ońdasyn Orazalın «Antıkordyń» qoǵam arasynda, sonyń ishinde kitaphanalar arqyly parasattylyq, adaldyq qaǵıdalaryn ilgeriletetin «Parasat joly» jańa jobasyn júzege asyrý kezindegi mańyzdylyǵyn atap ótti. Joba jazýshy, aqyn, bilim men ǵylym qaıratkerleri syndy zııalylardyń basyn qosty.

«Qoǵam keıde «jemqorlyqty eshkim jeńe almaıdy» dep kúdiktenedi. Biz osy kúdikti seıiltýimiz kerek. Kózqaras ta ózgerýi tıis. Memlekettik organdar men qoǵam birge bolsa, «alanbaıtyn qamal, jeńilmeıtin jaý» bolmaıdy. Aqtóbe óńirine keler bolsam, munda kóp is tyndyrylǵan. «Adaldyq alańy» jobasy – halyqtyq joba. Servıstik ákimdiktiń jumysy da nátıje berdi», - dedi Parasat joly» respýblıkalyq ortalyǵynyń basshysy, jazýshy, qoǵam qaıratkeri Sádibek Túgel.

Aıta keteıik, sybaılas jemqorlyqqa qarsy is-qımyl jobasy Aqtóbe oblysynda belsendi júzege asyrylyp keledi. Óńirdegi 233 memlekettik kitaphanada oblystyq sybaılas jemqorlyqqa qarsy is-qımyl qyzmeti men mádenıet basqarmasy arasyndaǵy memorandýmǵa sáıkes «Parasat joly» ortalyǵy jumys isteıdi. Bul alańdarda qoǵam qaıratkerleri, zııalylar men ǵalymdar jáne rýhanııat ókilderi únemi aqparattyq-aǵartý jumystaryn júrgizip otyrady.