«Parasat» Ulttyq ǵylymı-tehnologııalyq holdınginiń bas býhgalteri sottaldy
ASTANA. 31 qazan. QazAqparat - 2013 jylǵy qańtarda Astana qalasy boıynsha qarjy polıtsııasy departamentine «Parasat» Ulttyq ǵylymı-tehnologııalyq holdıngi» AQ-nyń basshylyǵy kásiporynnyń qarajat shyǵyny týraly jazbasha aryz bergen.
Bul týraly Astana qalasy boıynsha ekonomıkalyq jáne sybaılas jemqorlyqqa qarsy kúres jónindegi departamenttiń baspasóz habarynda aıtylǵan.
Astana qalasy boıynsha ESJQKD atalǵan aryzǵa sáıkes tergeý aldy tekserýin júrgizdi. Onyń qorytyndysy boıynsha 22 qańtarda «Parasat» holdınginiń bas býhgalteri Maılınaǵa qatysty aktsıonerlik qoǵamnyń 7,5 mln. teńgesin jymqyrý faktisi boıynsha qylmystyq is qozǵaldy.
Tergeý anyqtaǵandaı, Maılına óziniń qyzmettik jaǵdaıyn paıdalanyp, óziniń esepshot kartasyna jalaqy túrinde negizsiz tólem aýdarý arqyly 7,5 mln. teńgeni jymqyrǵan.
Astana qalasy Almaty aýdanynyń №2 sot úkimimen Maılınaǵa shartty túrde 7 jylǵa bas bostandyǵynan aıyrý jazasy taǵaıyndaldy.
Tergeý barysynda holdıngke keltirilgen zalaldyń tolyq kólemde orny toltyryldy.
