«Parasat» kásipkerler alıansy «Baıtaq» jasyldar partııasymen birikti

ASTANA. KAZINFORM – «Parasat» kásipkerler alıansy» qaýymdastyǵy Qazaqstannyń «Baıtaq» jasyldar partııasyna qosyldy.

«Prezıdent sońǵy Joldaýynda bıznesti qorǵaý qajettigin aıtty. Rasynda da búginde bızneske ekonomıkalyq, saıası baǵytta úlken qoldaý qajet. Óıtkeni, kásipker táýekelge baryp, qarajat bólý arqyly úlken jobalardy júzege asyrý arqyly salyq tóleıdi, jańa jumys oryndaryn qamtamasyz etedi. Memleketimiz naryqtyq ekonomıkada ómir súrip jatyr. Demek, naryqtyq ekonomıkanyń negizgi kórsetkishi – kásipkerlik. Kásipkerler kásipkerlikpen aınalysqanda esh nárseden qoryqpaı jumys isteýi tıis. Al ol úshin qoǵamdyq myqty lobbıshiler bolýy tıis. Sondyqtan «Baıtaq» jasyldar partııasy «Parasat» kásipkerler alıansy» qaýymdastyǵymen qosylyp, kásipkerlikti qoldaý úshin úlken baǵyt ashyp jatyr», - dedi «Baıtaq» partııasynyń tóraǵasy Azamathan Ámirtaı.

Onyń atap ótýinshe, «Parasat» kásipkerler alıansy» qaýymdastyǵynyń basqarma tóraǵasy Oleg Pak «Baıtaq» partııasy tóraǵasynyń orynbasary bolady. Ol partııanyń bıznes qoǵamdastyqpen ózara is-qımyl máselelerine jetekshilik etedi.

«Baıtaq» - saıası partııa. Baǵytymyz – qorshaǵan ortany qorǵaý, jasyl ekomıka. Saıası partııa retinde saılaýlarǵa qatysyp, úmitkerler daıyndaımyz, saılaý shtabtaryn quramyz. Al saılaý bolmaǵan kezde qorshaǵan ortany qorǵaý, jasyl ekonomıkany kóterý baǵytyndaǵy ekonomıkalyq saıasatpen aınalysamyz. Al jasyl ekonomıkany damytý úshin bizge senim artatyn kásipkerler, ınvestorlar kerek. «Parasat» kásipkerler alıansy» qaýymdastyǵy partııamyzǵa jańa músheler ákeledi. Kelesi jyly aýdan jáne oblystyq aýqymdaǵy qalalardyń ákimderin saılaý ótedi. Atalǵan saılaýǵa qatysý úshin úmitkerlerimiz bolýy kerek. Kásipkerler arasynan isin, jumysyn biletin úmitkerlerdi tartýymyz qajet. Erteń ol ákim bolǵanda partııamyzdy sózge qaldyrmaı, memleketke paıdasyn ákeletin úmitker bolýy tıis», - dedi Azamathan Ámirtaı.

Onyń dereginshe, búginde partııanyń qatarynda 102 myń múshe bar. Sońǵy ýaqytta Kentaý men Temirtaý qalasynda fılaldary ashyldy.