PARAQTA – kitap oqýdy kúndelikti ádetke aınaldyratyn otandyq platforma
ASTANA. KAZINFORM – Kitap oqýdy josparlap, biraq kúndelikti tirlikpen júrip ony keıinge qaldyratyn adamdarǵa arnalǵan otandyq PARAQTA platformasy damyp keledi. Saıt oqyrmanǵa oqý maqsatyn belgileýge, oqyǵan betterin esepteýge jáne kitap týraly pikirin jazýǵa múmkindik beredi.
Joba iske qosylǵaly beri platformaǵa 8 myńnan astam adam tirkelip, olar birge 960 myńǵa jýyq bet oqyǵan. Bul týraly platformanyń negizin qalaýshy Erdáýlet Aıanuly Jibek Joly telearnasynyń «Búgin.LIVE» baǵdarlamasynda aıtty.
Onyń aıtýynsha, ıdeıa birneshe jyl buryn óziniń kitap oqýǵa degen qyzyǵýshylyǵynan bastalǵan. Ol oqyrmandar klýbyna qosylyp, keıin eriktilermen birge kitap oqý mádenıetin nasıhattaýǵa kirisken. Astanada bas qosatyn oryn bolmaǵandyqtan, komanda kitapsúıer qaýymǵa arnalǵan kofehana ashqan. Alaıda qarjylyq qıyndyqtarǵa baılanysty bul jobany jabýǵa týra kelgen.
— Ol oryn men úshin erekshe, jyly ári jaqyn meken boldy. Onda túrli shyǵarmashylyq is-sharalar ótkizilip, Astanadaǵy kitap oqýǵa qyzyǵatyn adamdardy jınadyq. Jobany jabý ońaı bolǵan joq. Biraq kitap oqý mádenıetin damytý ıdeıasynan bas tartqym kelmedi. Buǵan deıin qoldanǵan Telegram-botymyz bar edi. Alǵashynda ony oqyǵan betterdi belgileıtin qural retinde paıdalandyq. Keıin osy ıdeıany damytyp, saıt jasaýǵa kiristim, – dedi Erdáýlet Aıanuly.
Onyń aıtýynsha, alǵashqy nusqany ázirleýge jasandy ıntellekt kómektesken. Saıttyń bastapqy nusqasy úsh aıda daıyn bolǵan. Keıingi tórt-bes aıda platformaǵa jańa múmkindikter qosylyp, dızaıny jetildirilgen. Jalpy, jobany ázirleý jumysy segiz-toǵyz aıǵa sozylǵan.
Platformanyń basty ereksheligi – oqyrmanǵa kitap oqýdy júıeleýge kómektesýi. Qoldanýshy qaǵaz kitap oqysa da, elektrondy nusqasyn paıdalansa da, oqyǵan betterin belgilep, jeke oqý statıstıkasyn júrgize alady. Al platformadaǵy kitaptardy saıttyń ózinen oqýǵa múmkindik bar.
Qazir PARAQTA kitaphanasynda 148 kitap usynylǵan. Olardyń qatarynda qazaqtyń halyq ertegileri, Abaıdyń qara sózderi, aǵylshyn jáne orys tilindegi kitaptar, sondaı-aq aýdarma shyǵarmalar bar. Joba avtorynyń sózinshe, oqyrmandar qazaq klassıkasy men ulttyq ádebıetke kóbirek qyzyǵýshylyq tanytady.
Jobada oqyrmannyń belsendiligin arttyrýǵa arnalǵan jeke akkaýnt júıesi de qarastyrylǵan. Qoldanýshy kitap oqyǵan saıyn juldyzsha jınap, paraqshasynyń dızaınyn ózgertip, vırtýaldy bólmesin bezendire alady. Osylaısha adamnyń oqý belsendiligi onyń jeke paraqshasynan da kórinis tabady.
— Biz adamdardy kitapty kúshtep oqytýǵa bolmaıdy dep oılaımyz. Oǵan qyzyqtyratyn basqa jol tabý kerek. Mysaly, bizdiń platformada adam kóp oqyǵan saıyn juldyzsha jınaıdy. Ony jeke paraqshasyn bezendirýge paıdalana alady. Kitap oqýdy osyndaı shaǵyn jetistikter arqyly yntalandyrýǵa bolady. Bir jylda 60 kitap oqyǵan tórt qatysýshymyz bar. Bul – oqýǵa degen turaqty ádet qalyptastyrýǵa bolatynyn kórsetetin mysal, – dedi joba avtory.
Platformada aqyly jáne tegin múmkindikter bar. Aqyly nusqada oqyrman kitapty ózge qoldanýshylarmen qatar oqyp, olardyń qansha betke jetkenin jáne oqý qarqynyn kóre alady. Sonymen birge oqyrmandar klýbtaryna qatysyp, reıtıng júıesinde óz belsendiligin salystyrýǵa múmkindik bar. Kitap týraly pikir qaldyrý qyzmeti de qarastyrylǵan. Qazir platformada 600-ge jýyq pikir jınalǵan.
Erdáýlet Aıanulynyń aıtýynsha, jobanyń taǵy bir maqsaty – oqyrmandardy bir ortaǵa biriktirý. Qaladaǵy kitapsúıer qaýym bas qosyp, oqyǵan shyǵarmalaryn talqylaı alady. Qazir Astanadaǵy oqyrmandar klýbynda 300-ge jýyq adam bar. Olardyń arasynda 20–25 jastaǵy jastar belsendi.
— Meniń mamandyǵym – ınjener-jobalaýshy. Negizgi jumysym óz salamda, al PARAQTA bastapqyda hobbı retinde bastaldy. Biraq kitaptyń adamnyń oılaýyna, dúnıetanymyna qalaı áser etetinin túsingen saıyn, osy tájirıbeni ózgelermen de bóliskim keldi. Qazir bul bastama jeke iske aınalyp keledi. Komandada eki adam ǵana jumys isteımiz, jasandy ıntellekt quraldaryn da qosymsha paıdalanamyz, – dedi ol.
Joba avtory aldaǵy ýaqytta platformany mobıldi qosymshaǵa aınaldyrýdy josparlap otyr. Qazir iPhone qoldanýshylaryna arnalǵan nusqany App Store dúkenine shyǵarý úshin ruqsat kútip otyr. Android júıesine arnalǵan qosymshany da ázirleý josparda bar. Qosymshany júkteý tegin bolady, alaıda aqyly jazylymdar da saqtalady.
Erdáýlet Aıanulynyń pikirinshe, kitap oqýdy keńinen nasıhattaý úshin ony adamdardyń kúndelikti ómirine yńǵaıly etip engizý qajet. Onyń sózinshe, tsıfrlyq platformalar men mobıldi qosymshalar oqýǵa qyzyǵýshylyqty arttyryp, adamdarǵa óz oqý daǵdysyn qalyptastyrýǵa kómektese alady.
PARAQTA komandasy osylaısha kitapty jaı ǵana oqyp shyǵýǵa emes, odan alǵan oıdy saralap, pikir bólisýge jáne turaqty oqý ádetin qalyptastyrýǵa múmkindik beretin orta qurýdy kózdeıdi.
Osyǵan deıin Prezıdent kitap oqýdyń jastardy aqparat tasqynyna jutylyp ketýden saqtaıtyn rýhanı qalqan ekenin aıtqan bolatyn.
