Paranja kıgender 150 eýrodan 15 myń eýroǵa deıingi somada aıyppul tóleıdi - Frantsııa
ASTANA. Mamyrdyń 1-i. QazAqparat - Beıresmı málimetter boıynsha, Frantsııada qoǵamdyq oryndarda dástúrli musylman kıimderiniń elemetterin kııýge tyıym salynǵan zań jobasy ázirlenip jatqan kórinedi.
Ol zań jobasyna sáıkes, tyıymdy buzyp, paranja kıgenderge 150 eýro kóleminde aıyppul salynsa, al basqa adamdy atalǵan tyıymdy buzýǵa májbúrlegeni úshin 15 myń eýro aıyppul jáne 1 jyl túrme kútedi. Bul týraly Associated Press agenttigi frantsýz basylymdaryna silteme jasap habarlady.
Esterińizge sala keteıik, sáýirdiń 21-inde Frantsııa Prezıdenti Nıkolıa Sarkozı el úkimetine qoǵamdyq oryndarda paranja men nıkab kııýge tyıym salatyn zań jobasyn ázirleýdi tapsyrǵan bolatyn. Frantsýz Respýblıkasynyń basshysy, bet-basty tumshalaıtyn kez-kelgen dástúrli kıimge tyıym salý kerek ekenin, sebebi ondaı kıimder qyz-kelinshekterdi qorlaıtynyn málim etti. Úkimetke qysqa merzimniń ishinde zań jobasyn ázirlep, mamyr aıynda ony parlamenttiń qaraýyna usyný mindetteldi.
Esterińizge sala keteıik, 2004 jyldan beri Frantsııada mektepterde paranja men nıkab kııýge, buqaralyq oryndarda dinı sımvolıkalar ustaýǵa tyıym salynǵan.
Degenmen, birqatar frantsýz sarapshylary, dástúrli musylman kıimderine tyıym salý Frantsııa Konstıtýtsııasyna qaıshy ekenin aıtýda. Oǵan qosa, bul bastama elde turyp jatqan 5 mıllıon musylmannyń narazylyǵyn týǵyzýy múmkin.
Paranja kııýge tyıym salý týraly zań jobasy Belgııa parlamentinde de qaralyp jatyr. Aǵymdaǵy aptada Belgııa Parlamentiniń tómengi palatasy paranja kııýge tyıym salǵan zań jobasyn maquldady. Atalmysh qujat áıelderge qoǵamdyq oryndarda betterin jabatyn kıimmen júrýge tyıym salady. Eger zań kúshine ense, zańdy buzýshylardy 25 eýroǵa deıin aıyppul nemese 7 kúnge deıin túrme kútip tur.
