Parany bank kartochkasyna aýdarýdy talap etken polıtseı jazalandy - Qyzylorda
Atalmysh qylmystyq is Qyzylorda qalasynyń № 2 sotynda qaraldy. Onyń ústinen jábirlenýshi M. sybaılas jemqorlyqqa qarsy is-qımyl ulttyq bıýrosynyń Qyzylorda oblysy boıynsha departamentine aryzdanǵan.
Jábirlenýshiniń aıtýynsha, ol óziniń basqarýyndaǵy avtokóligimen dosy ekeýi jeke sharýasymen «Atameken» saýda ortalyǵyna keledi. Ol Qyzylorda qalasyndaǵy Pýshkın kóshesimen bir baǵytqa júrýge arnalǵan jol talabynyń belgisin baıqamaı qalǵan. Sol ýaqytta sońynan polıtsııa qyzmetiniń qyzmettik avtokóligi kelip, bir baǵytqa arnalǵan jolǵa kólikpen qarsy kelgenin eskertedi. Jol erejesin buzǵandyǵy úshin avtokóligine otyrǵyzyp alady. Jasalǵan ákimshilik quqyq buzýshylyqty bir jyl ishinde qaıtalap jasap turǵanyn nazarǵa salady. Bul úshin júrgizý kýáliginen aıyrý jazasy kózdelgenin aıtýdy da umytpaıdy. Jábirlenýshiden júrgizý kýáliginen aıyrmaý úshin 30 myń teńge talap etkenin emeýrinmen bildiredi. Degenmen kólik júrgizýshi M. atalǵan aqsha qarajatyna múmkinshiliginiń joqtyǵyna baılanysty 2 myń teńgeni polıtsııa qyzmetkeri B-nyń qolyna ustatady. Atalmysh qarjyny mardymsyz kórgen polıtsııa qyzmetkeri odan bólek óziniń JSN nómerin berip, bank kartochkasy arqyly 7 myń teńge salýdy mindetteıdi. Jábirlenýshiniń aryzy negizinde sottalýshy B-nyń is-áreketterine jasyryn tergeý áreketteri júrgizilgen. Onyń ústinen QR Qylmystyq kodeksiniń 366-babynyń 1-bóligimen is qozǵaldy. Burynǵy tártip saqshysy qyzmetinen bosatylyp, polıtsııa leıtenanty sheninen aıyryldy. Oǵan paranyń 50 eselengen somasy mólsherinde aıyppul taǵaıyndaldy. Aıyppuldyń jalpy kólemi 450 myń teńgeni quraıdy.