Parany «aıfon» kúıinde alǵan aýdan ákimine sot úkimi shyqty
NUR-SULTAN. QazAqparat – Nur-Sultan qalasy Baıqońyr aýdanynyń ákimi Asqar Esilovke para alǵany úshin 15 mln teńge aıyppul salyndy, dep habarlaıdy QazAqparat tilshisi.
«Aýdan ákimi 2019 jyldyń qarasha aıynda Nur-Sultan qalasyndaǵy «Baıqońyr» aýdanynyń aýmaǵyn abattandyrý boıynsha qosalqy merdigerlik jumystardy alýǵa kómekteskeni, sondaı-aq jalpy qamqorlyǵy úshin jeke kompanııa ókilinen «IPHONE»-nyń sońǵy úlgisi túrinde para aldy degen kúdikke ilingen», - dedi Sybaılas jemqorlyqqa qarsy is-qımyl agenttiginiń 1-shi departamentiniń aǵa tergeýshisi Danııar Bekaıdarov elordada ótken baspasóz máslıhatynda.
Aýdan ákimimen birge qylmystyq jaýapkershilikke «Dory build» JShS ókili S.Nurtazın de tartylǵan. Tergeý barysynda kúdiktiler kinásin moıyndaǵan.
«Esil aýdandyq №2 sotynyń úkimimen Esilov 15 mln 450 myń teńge jáne Nurtazınge 7 mln 725 myń teńge somasynda aıyppul salyndy. Olar ómir boıy memlekettik qyzmette qyzmet atqarý quqyǵynan aıyryldy», - dedi aǵa tergeýshi.
