Paramount Warner Bros. Discovery kompanııasyn satyp alyp, Skydance medıakompanııasyn qurdy
ASTANA. KAZINFORM — Paramount kompanııasy Warner Bros. Discovery-di 110 mlrd dollarǵa satyp alý jónindegi mámileni aıaqtap, nátıjesinde Skydance atty jańa birikken medıakompanııa quryldy. Jańa qurylymnyń bas dırektory bolyp Devıd Ellıson taǵaıyndaldy, dep habarlaıdy Agenzia Nova.
Mámile aıasynda «Mıssııa oryndalmaıdy», «Garrı Potter» jáne DC sııaqty tanymal franshızalarymen belgili Paramount pen Warner Bros. kınostýdııalary, sondaı-aq CBS, CNN, Paramount+ jáne HBO Max sekildi iri televızııalyq jáne strımıngtik aktıvter biriktirildi.
Birikken kompanııanyń aktsııalary 6 qazanda Nıý-Iork qor bırjasynda (NYSE) SKYD tıkerimen saýdalana bastady. Mámileniń aıaqtalýyna birqatar quqyqtyq máselelerdiń rettelýi, sonyń ishinde shtattar koalıtsııasymen jáne AQSh Stsenarıster gıldııasymen jasalǵan kelisimder sebep boldy.
Skydance kompanııasynyń qurylýy álemdik medıaındýstrııadaǵy qurylymdyq ózgerister kezeńine tuspa-tus kelip otyr. Bul ózgerister kabeldik televıdenıege jazylýshylar sanynyń azaıýyna, strımıngtik servısterdi damytý shyǵyndarynyń ósýine jáne Gollıvýdtaǵy eńbek naryǵyndaǵy ózgeristerge baılanysty.
Skydance kompanııasyn Devıd Ellıson 2010 jyly qurǵan. Kompanııa Paramount-tyń birqatar iri kınojobalaryn, sonyń ishinde «Top Gan: Meverık» fılmin óndirýge qatysýy arqyly tanymal bolǵan.
Mámile aıaqtalǵannan keıin Ellıson buǵan deıin Mattel kompanııasyn basqarǵan Inon Kreızdi Skydance-tiń teń bas dırektory etip taǵaıyndady. Ol kompanııanyń kúndelikti jumysyn basqarýǵa, aktıvterdi biriktirýge, shyǵarmashylyq baǵytqa jáne strategııalyq damýǵa jaýap beredi.
Paramount málimetinshe, birikken kompanııa shamamen 6 mlrd dollar únemdeýi tıis. Shyǵyndardy qysqartýdyń negizgi bóligi strımıngtik tehnologııalar men bultty ınfraqurylymdy biriktirý esebinen júzege asyrylady dep josparlanǵan.
Sonymen qatar birikken kompanııa shamamen 80 mlrd dollar kólemindegi eleýli boryshtyq mindettemelerdi muraǵa alady. Skydance basshylyǵynyń aldynda strımıngtik bıznesti damytý, kabeldik jelilerden túsetin kiristi saqtaý jáne kıno prokaty baǵytynyń tıimdiligin arttyrý mindeti tur.
CNN basshysy Mark Tompson men CBS News redaktory Barı Vaıs jańa qurylymdaǵy qyzmetterin saqtap qalady.
Buǵan deıin Ulybrıtanııa Paramount Skydance-tyń Warner Bros. Discovery-di satyp alýyna ruqsat bergen bolatyn.
