Paramen ustalǵan shymkenttik prokýror men tergeýshiniń soty bastaldy
Abaı aýdandyq sotynda qaralyp jatqan protseste Ońtústik Qazaqstan oblystyq prokýratýrasyna qarasty arnaıy prokýrorlar basqarmasynyń prokýrory Nııazov pen Abaı aýdandyq polıtsııa bóliminiń tergeýshisi Amanqulovqa qatysty Qylmystyq kodekstiń eki babymen aıyp taǵyldy. Bul týraly búgin Ońtústik Qazaqstan oblystyq sotynyń sýdıasy Búrkit Baıdýllaev málimdedi.
Sýdıanyń aıtýynsha, prokýror men tergeýshige Qylmystyq kodekstiń 24-babynyń 3-bóligi «Qylmysqa daıyndalý jáne qylmysqa oqtalý» jáne 366-baby 3-bóliginiń 1-2 tarmaqtarymen «Para alý» (qorqytyp alý jolymen, adamdar tobynyń aldyn ala sóz baılasýymen) aıyp taǵylyp otyr. Alǵashqy sot otyrysy 14 qarasha kúni bastaldy.
Sondaı-aq, brıfıngte quzyrly organ men qadaǵalaýshy organ ókilderiniń naqty qandaı qylmys jasaǵany aıtyldy.
«Aıyptalýshylar «Kompanııa Shymkent mıneral» JShS-niń dırektory Turabaev salyqtardy tóleýden jaltarǵany jáne zańbuzýshylyq pen jalǵan kásipkerliktiń belgisi bar degen ýájben osy is boıynsha tıisti jaýapkershilikke tartylatyndyǵyn eskertip, odan 2 mln teńge syıaqy talap etken. Atalǵan aıyptalýshylar osy syıaqyny Ońtústik Qazaqstan oblystyq prokýratýrasyna qarasty arnaıy prokýrorlar basqarmasynyń ǵımaratynyń qyzmet bólmesinde alý barysynda ustalǵan», - dedi sýdıa Búrkit Baıdýllaev.
Esterińizge salaıyq, aǵymdaǵy jyldyń 24 shildesinde prokýratýra qyzmetkeri men tergeýshi 2 mıllıon teńge para alý kezinde Bas prokýratýranyń Іshki tergeý departamenti men QR Sybaılas jemqorlyqqa qarsy is qımyl bıýrosy qyzmetkerlerimen ustalǵan bolatyn. Olarǵa QR Qylmystyq Kodeksiniń 366-baby 3-bóliginde kózdelgen qylmys quramyna sáıkes (adamdar tobynyń aldyn ala sóz baılasý arqyly para alý) boıynsha is qozǵalyp, biryńǵaı sotqa deıingi tergep-tekserý tiziminde tirkelgen edi. Ustalǵan prokýratýra qyzmetkeri Shymkent qalasynyń ýaqytsha ustaý ızolıatoryna qamaýǵa alynǵan. 