Paralımpıadashy Zúlfııa Ǵabıdýllına 46 jyl burynǵy jol apaty týraly aıtyp berdi
ASTANA. QazAqparat - Qazaqstan tarıhynda Paralımpıada oıyndarynan «altyn» alǵan alǵashqy sportshy Zúlfııa Ǵabıdýllına osydan 46 jyl buryn túsken jan túrshigerlik jol apaty týraly aıtyp berdi, dep habarlaıdy QazAqparat.
Zúlfııa Ǵabıdýllına otbasyndaǵy alǵashqy bala eken. Óziniń aıtýynsha, óte tynyshsyz, únemi qozǵalys ústinde bolǵan.
«Ata-anamnyń aıtýynsha, eger men eki mınýt tynysh otyryp qalsam, birdeme búldirip otyrady ekenmin. Ata-anam eki mınýt demalsa, onda jarty saǵat boıy men shashqan jerdi jınap, qaıta sharshaıdy eken. Esimdi bilgennen beri buryshta turyp óstim, biraq, sol buryshta turyp-aq «endi ne búldirsem eken» dep oılanyp turatynmyn (kúledi). Balabaqshaǵa barý úlken másele edi. Anam ekeýmiz avtobýspen júrgende, bir esiginen kirip, bir esigen shyǵatynmyn. Maǵan sol qozǵalys unaıtyn», - deıdi sportshy.
Zúlfııa bes jasta bolǵanda, jol apatyna ushyraǵan. Sol kúni baǵdarshamnyń jasyl túsine ótip bara jatqan Zúlfııany, anasy men baýyryn mas kúıde bolǵan mototsıklshi qaǵyp ketken eken.
«Jol apaty esimde qala qoıǵan joq, bárin ata-anam aıtyp bergen. Meni jetektegen, qolynda emshektegi sábıi bar anam úsheýimizdi mas mototsıklshi soǵyp ketipti. Anamnyń shoshyǵany sondaı, qolyndaǵy balany bireýge bere salyp, maǵan qaraı júgirgen eken. Men mototsıkldiń astynda qalyp qoıyppyn, óıtkeni, kóılegim kólikke ilinip qalǵan. Meni súırep ketken mototsıkl aǵashqa baryp soǵylypty. Omyrtqam túgel syndy, aıaq-qolym gıpstelip, tipti, tilimde de kemistik paıda bolǵan...»,-deıdi sol qorqynyshty apatty eske alǵan sportshy.
Degenmen, jigeri myqty Zúlfııa sol sátten bastap sportqa qumarta bastaǵan.
«Sizdiń aldyńyzda eshkim mindetti emes. Mysaly, meniń basymnan ótken oqıǵa úshin de maǵan bireý kómektesýge mindetti emes. Arbaǵa tańylǵanyń úshin ózgelerdiń mazasyn alyp, bul ómirge ókpeleýge bolmaıdy. Tek alǵa bastap, maqsat qoıa bilý kerek», - deıdi Zúlfııa.
Zúlfııa Ǵabıdýllına bolashaqta da Paralımpıada oıyndaryna qatysyp, ózin bıikterden kórsetkisi keledi.
