«Paralımpıadashy» fılminiń kassasy 44 mln teńgege jetti

NUR-SULTAN. QazAqparat – Osydan bir aı buryn kórermenge jol jartqan «Paralımpıdashy» fılminiń kassasy 44 mln teńgege jetti. Parashańǵyshy Aleksandr Kolıadınniń jeńis jolyn sýretteıtin fılmdi rejısser Aldııar Baıraqymov túsirgen edi, dep habarlaıdy QazAqparat tilshisi.

Aıta keterligi, Ulttyq kınony qoldaý memlekettik ortalyǵynyń qarjyldandyrýymen bıyl «Paralıpıadashy» fılminen bólek «Alǵa», «1941 jyldyń jazy», «Aqyn», «Syzba», «Patrıottar ýaqyty» syndy týyndylar da kórermen nazaryna usynylǵan bolatyn.

«Olardyń qorytyndysyn shyǵarýǵa áli erte. Keıbir prokat áli aıaqtalǵan joq, strımıngtik platformalarda kórsetilip jatqandary da bar. Keń prokatqa shyqqandardyń ishinde túsken qarajaty boıynsha «Paralımpıadashy» fılmi kósh bastap keledi. 18 mamyrdaǵy derekke sáıkes, onyń kórsetiliminen túsken qarajat 44 mln teńgege jetti», delingen atalǵan ortalyqtyń QazAqparattyń resmı saýalyna bergen jaýabynda.

Aıta keteıik, «Paralımpıadashy» fılmi otandasymyz parashańǵyshy Aleksandr Kolıadınniń shynaıy ómirine, sport jolyna arnalǵan. Bala kezinen olımpıada chempıony atanýdy armandaǵan sportshy birde kólik apatyna túsip, eki aıaǵynan aıyrylady. Osydan keıin uzaq ýaqyt kúızeliske túsken sportshyǵa óz kúshin Paralımpıada oıyndarynda synap kórý usynylady. Úlken sportqa oralǵannan keıin ol 2018 jyly Phenchhanda ótken qysqy Paralımpıada oıyndaryna qatysyp, 1,5 shaqyrymdyq sprıntte altyn medal aldy.