Paralımpıadashylarǵa qoldaýdy aıamaý kerek – Elsııar Qanaǵatov
ASTANA. KAZINFORM – Búgingi tańda qazaqstandyq parasportshylar Frantsııa astanasy Parıj qalasynda ótetin XVII Paralımpıada oıyndaryna 7 sport túrinen 11 joldama jeńip aldy.
Aıta ketsek, paralımpıada oıyndary – 1960 jyldan beri ár tórt jyl saıyn dene múmkindikteri shekteýli sportshylar arasynda ótkiziletin sporttyq jarys.
Bıylǵy paraoıyndar 28 tamyzben 8 qyrkúıek aralyǵynda ótedi. Kazinform tilshisinne suhbat bergen Olımpıadaǵa daıyndyq shtabynyń jetekshisi Elsııar Qanaǵatov Qazaqstan Respýblıkasy atynan paralımpıadaǵa 38 sportshy aparýdy josparlap otyrǵanyn atap ótti.
«Búgingi kúnge deıin parasportshylarymyz 7 sport túrinen 11 joldama jeńip aldy. Buıyrsa, tórtjyldyq dodada 9 sport túrinen, atap aıtsaq, para jeńil atletıka, para paýerlıftıng, para taekvondo, para ústel tennısi, para júzý, para dzıýdo, para kanoe, para oq atý jáne voleıboldy otyryp oınaý túrlerinen jalpy 38 sportshy óner kórsetedi dep josparlap otyrmyz», - dedi shtab basshysy.
Sonymen qatar paralımpıada oıyndarynda sportshylarymyz sońǵy oıyndarda óte joǵary nátıje kórsetip kele jatqanyn basa aıtty.
«Ózderińiz de baıqap júrsizder, sońǵy oıyndarda parasportshylarymyz árdaıym jarqyn jeńisterimen qýantyp júr. Alysqa barmaı-aq qoıaıyq, sońǵy Tokıo Olımpıdasynda saý deneli sportshylarymyz ala almaǵan altynǵa múmkindigi shekteýli sportshylarymyz qol jetkizdi. Bul ózge sportshylarymyzǵa sabaq bolýy tıis. Sondyqtan paralımpıadada jeńis tuǵyrynan kóringen sportshylarymyz naǵyz batyrlar. Biz múmkindigi shekteýli sportshylarymyzdan da eshqandaı qoldaýdy aıamaýymyz kerek», - dedi Elsııar Qanaǵatov.
Osy oraıda parasportshylarymyz jeti sport túrinen joldamany qashan, qalaı jeńip alǵanyn oqyrman nazaryna usyna ketkendi jón sanadyq.
Birinshisi – erler arasynda voleıboldy otyryp oınaýdan joldama.
Bul lıtsenzııa 2023 jyly 3-8 shildede Astana qalasynda ótken Azııa chempıonatynda alyndy.
Qazaqstan komandasy fınalda Iran quramasynan jeńildi (Alaıda Iran komandasynda lıtsenzııa bolǵandyqtan, Azııa chempıonatynyń kúmis júldegeri retinde bul lıtsenzııa Qazaqstan quramasyna buıyrdy).
Ekinshisi – ıadrony ıterý dıstsıplınasynda para jeńil atletıkadan joldama.
Bul lıtsenzııa 2023 jyly 3-17 shildede Parıj qalasynda (Frantsııa) ótken para jeńil atletıkadan álem chempıonatynda alyndy. Qazaqstandyq sportshy Dastan Muqashbekov úshinshi orynǵa qol jetkizip, qola medalǵa ıe boldy (lıtsenzııa osy sport túrinde 1-4 oryn alǵan sportshylarǵa berildi).
Úshinshisi – brasspen 100 m dıstsıplınasynda para júzýden lıtsenzııalar (3 joldama).
Bul joldama 2023 jyly 27 shilde - 8 tamyz aralyǵynda Manchester qalasynda (Ulybrıtanııa) ótken para júzýden álem chempıonatynda alyndy. Qazaqstandyq sportshy Jumaǵalı Nurdaýlet ekinshi orynǵa qol jetkizip, kúmis medalǵa ıe boldy (joldama osy sport túrinde 1-3 oryn alǵan sportshylarǵa berildi jáne qalǵan joldama aqpan aıynyń basynda Halyqaralyq federatsııadan berildi).
Tórtinshisi – 200 metrge KL 200 dıstsıplınasynda para kanoeden joldama.
Bul joldama 2023 jyly 19-29 tamyzda Dýısbýrg qalasynda (Germanııa) ótken baıdarka men kanoe jáne para kanoeden álem chempıonatynda alyndy.
Qazaqstandyq sportshy Bıbarys Spataı besinshi oryn alyp, jodamaǵa qol jetkizdi.
Besinshisi – para paýerlıftıngten joldama
Qazirgi ýaqytta otandyq sportshy Davıd Degtıarev reıtıngtiń birinshi ornynda tur jáne jodama alý úshin ol 2024 jyly eki álem kýbogyna qatysýy kerek.
Altynshysy – para taekvondodan lıtsenzııalar (3 joldama)
Qazirgi ýaqytta reıtıng qorytyndysy boıynsha úsh otandyq sportshyǵa lıtsenzııa berildi. Atap aıtqanda, 57 kg deıin – Dosmalova Kamıla, 80 kg deıin – Dombaev Nurlan jáne +80 kg – Nyshan Ómiráli.
Jetinshisi – para oq atýdan joldama
Qazaqstandyq sportshy Erkin Ǵabbasov pnevmatıkalyq myltyqtan paralımpıadalyq atý boıynsha álem kýbogynda ekinshi oryn aldy. Sonymen Parıj-2024 Paralımpıada oıyndaryna qatysatyn boldy. Sonymen qatar 2024 jylǵy mamyr-maýsym aralyǵynda 5 sporttyq is-shara ótkizý josparlanyp otyr. Onda sporttyń 5 túri boıynsha 16 lıtsenzııa jeńip alý josparda bar.
Esterińizge sala ketsek, «Tokıo – 2020» paralımpıada oıyndarynda Qazaqstan ulttyq quramasynda 25 sportshy boldy. 5 medalge qol jetkizip (1 altyn, 3 kúmis jáne 1 qola) jalpy komandalyq esepte 48-oryndy ıelendi.
Esterińizge sala keteıik, osyǵan deıin Olımpıadaǵa joldama sany boıynsha qaı óńir kósh bastap kele jatqanyn jazǵan bolatynbyz.
