Paralımpıadashylarǵa qandaı qurmet kórsetse de jarasady – bas bapker

ASTANA. KAZINFORM – Búgin Prezıdent Paralımpıada júldegerlerin jáne bapkerlerdi memlekettik nagradalarmen marapattaý týraly Jarlyqqa qol qoıǵan bolatyn.

Osyǵan oraı paradzıýdodan ulttyq qurama komandanyń bas bapkeri Jandos Qııanov óz pikirin bólisip, shákirtteriniń jetistigi týraly aıtty.

«Búgin Memleket basshysynyń Jarlyǵy shyqty. Paralımpıadashylar memlekettik nagradaǵa ıe boldy. Óte qýanyshtymyz! Olarǵa qandaı qurmet kórsetse de jarasady. Parıjge 10 dzıýdoshy apardyq. Sonyń beseýi medal aldy. Chempıon da shyqty, kúmis jáne qola júldeger de bar. Menińshe, bul - jaqsy jetistik. Olardyń osy jarysqa qalaı daıyndalǵanyn men jaqsy bilemin. Kóp ter tókti. Úzdiksiz jattyqty. Tynbaı daıyndaldy. Eńbek aqtaldy. Halyq ta rıza dep oılaımyn», - dedi bas bapker.

Sonymen qatar Jandos Qııanov paralımpıadashylardyń Parıjdegi jeńisteri qoǵamdaǵy múmkindigi shekteýli adamdarǵa degen kózqarasty ózgertkenin atap ótti.

«Paralımpıadashylardyń Parıjdegi jeńisteri bizdiń qoǵamda úlken dúmpý týdyrdy. Óıtkeni olar qoǵamdaǵy múmkindigi shekteýli adamdarǵa degen kózqarasty ózgertti. Qazir on eki múshesi saý adamdardyń ózi ómirden túńilip jatady. Al bul kisiler bári adamnyń ózine, eńbegine baılanysty ekenin kórsetti. Adal eńbek qana jetistik ákeletinin dáleldedi. Árkim bárin ózinen bastaýy kerek ekenin jetkizdi», - dedi ol.

Sońǵy jyldary sport salasyndaǵy oń ózgerister parasportqa da óz múmkindikterin berip jatqanyn da umytpady.

«Qazir elimizde túrli ózgerister bolyp jatyr. Parasportta da oń ózgerister baryn aıtqym keledi. Burynǵydaı emes, qazir memleket tarapynan úlken qoldaý kórsetiledi. Oqý-jattyǵý jıyndary oıdaǵydaı ótedi. Biz sony sezinip otyrmyz. Parıjdegi nátıje sonyń dáleli. Sondyqtan elimizdi basqaryp otyrǵan Memleket basshysyna, barsha qoldaýshylarǵa, jankúıerlerge rahmet aıtamyn. Sizder qoldasańyzdar, biz áli talaı jeńiske jetemiz. Oǵan kúmánińiz bolmasyn», - dedi bas bapker Jandos Qııanov.