Paralımpıadanyń bastalýyna 4 kún qaldy: el namysyn kimder qorǵaıdy
ASTANA. KAZINFORM — 4 kúnnen keıin Italııanyń Mılan — Kortına-d’Ampetstso qalalarynda XIV qysqy Paralımpıada bastalady, dep habarlaıdy Týrızm jáne sport mınıstrliginiń baspasóz qyzmeti.
Bıylǵy dúbirli dodada Qazaqstan Respýblıkasynyń ulttyq quramasy para shańǵy jáne para bıatlon sport túrleri boıynsha el namysyn qorǵaıdy. Halyqaralyq arenada Qazaqstan atynan 7 sportshy synǵa túsedi.
Olar: Erbol Hamıtov, Nurlan Álimov, Aleksandr Gerlıts, ıÝrıı Berezın, Vladıslav Kobal, Sergeı Ýsoltsev jáne Anna Gracheva.
Qurama sapyndaǵy eń jas sportshy — para shańǵy jarysynda óner kórsetetin Vladıslav Kobal. Ol nebári 17 jasta. Al komandanyń eń tájirıbeli ári jasy úlken múshesi — para shańǵy jáne para bıatlonnan baq synaıtyn Sergeı Ýsoltsev. Onyń jasy 51-de.
Ulttyq quramadaǵy tájirıbeli sportshylardyń biri — Aleksandr Gerlıts. Ol 2022 jylǵy Beıjiń Qysqy Paralımpıadasynyń para bıatlonnan qola júldegeri. Sonymen qatar, 2018 jylǵy Phenchhan Paralımpıadasynda para shańǵy jarysynan úzdik tórttiktiń qataryna engen.
Sondaı-aq, Qazaqstan quramasynyń kóshbasshylarynyń biri Erbol Hamıtov — para bıatlon men para shańǵy jarysynan Álem chempıonattarynyń júldegeri jáne birneshe márte Álem kýbogy kezeńderiniń jeńimpazy. 2022–2023 jylǵy maýsymda ol para shańǵy jarysynan álem chempıony atanyp, Qazaqstan tarıhynda osy jetistikke qol jetkizgen alǵashqy para sportshy boldy. Al 2024–2025 jylǵy maýsym qorytyndysy boıynsha Erbol Hamıtov para bıatlonnan Álem kýbogynyń jalpy esebinde jeńiske jetip, 31 jyldan keıin Qazaqstanǵa Hrýstal globýsty qaıta ákeldi.
Aıta keteıik, 2026 jylǵy Qysqy Paralımpıada 6–16 naýryz aralyǵynda Italııada ótedi. Baıraqty dodaǵa álemniń 600-den astam sportshysy qatysyp, 79 medal jıyntyǵy sarapqa salynady.
Bıylǵy oıyndar erekshe mańyzǵa ıe — Qysqy Paralımpıada qozǵalysynyń 50 jyldyq mereıtoıy atap ótiledi. Alǵashqy Qysqy Paralımpıada 1976 jyly Shvetsııanyń Ernsheldsvık qalasynda ótken.
Osyǵan deıin Italııadaǵy Olımpıadada amerıkalyq taý shańǵyshysy aýyr jaraqat alǵanyn jazǵanbyz.