Paralımpıadalyq sport túrleri jigeri myqty adamdarǵa arnalǵany sózsiz - Máýlen Áshimbaev
Senattyń baspasóz qyzmetinen habarlaǵandaı, Palata tóraǵasy Máýlen Áshimbaev bochchadan Astana qalalyq týrnıriniń ashylý rásimine qatysyp, sóz sóıledi. Ol týrnırge qatysyp jatqan sportshylardyń muqalmas jigeri týraly jáne elimiz boıynsha júzdegen balanyń jeńiske degen qushtarlyǵyn oıatqan jattyqtyrýshy Sultanbek Orynbasarovtyń eren eńbegi jóninde aıtty. S. Orynbasarov elordalyq bochcha federatsııasynyń negizin qalaı otyryp, osy saıysqa qyzyǵýshylardyń aldyna Paralımpıada oıyndarynyń chempıony bolý degen bıik maqsattar qoıa bildi.
Senat spıkeri týrnırge qatysýshylarǵa sáttilik tilep, sport salasynda ınklıýzıvti orta qalyptastyrýdyń jáne erekshe qajettiligi bar azamattardy osyndaı saıystarǵa jumyldyrýdyń mańyzy zor ekenin atap ótti. Sondaı-aq, ol erekshe qajettiligi bar azamattardy qoldaý jóninde keshendi jumys júrgizý jáne ár adam ózin jaıly sezinetin kedergisiz orta qalyptastyrý memlekettiń aldynda turǵan mańyzdy mindetterdiń biri ekenin tilge tıek etti.
«Memleket basshysy Qasym-Jomart Kemeluly Toqaev erekshe qajettiligi bar azamattardy qoldaý máselesine únemi basa mán berip keledi. Paralımpıadalyq sport túrleri, birinshi kezekte, rýhy asqaq, jigeri myqty, maqsaty aıqyn adamdarǵa arnalǵany sózsiz. Sońǵy jyldarda elimizde bul salanyń qarqyndy damyp kele jatqany qýantady. Búgingi saıysqa qatysyp jatqan jas sportshylarymyz aldaǵy ýaqytta halyqaralyq jarystarda el namysyn abyroımen qorǵaıdy dep senemin», - dedi Máýlen Áshimbaev.
Sonymen qatar, Palata tóraǵasy Senat bul baǵyttaǵy sportshylarǵa jan-jaqty, onyń ishinde zańnamalyq deńgeıde de qoldaý kórsetýdi jalǵastyra beretinin aıtty. Osy rette, Qazaqstan bochcha federatsııasynyń kezekten tys konferentsııasynda Senat tóraǵasy Máýlen Áshimbaev atalǵan Federatsııanyń prezıdenti bolyp saılanǵanyn atap ótken jón.
Jarys «Qazaqstan bochcha federatsııasy» respýblıkalyq qoǵamdyq birlestigi men «Teń múmkindikter álemi» qoǵamdyq qorynyń uıymdastyrýymen jáne Astana qalasy ákimdigi, L. Gýmılev atyndaǵy Eýrazııa Ulttyq ýnıversıtetiniń qoldaýymen ótti.
Búgingi jarysqa 50-den astam sportshy qatysty. Baq synaǵandardyń qatarynda DTsP, kózi kórmeý, Daýn sındromy, aýtızm, ıntellektiń buzylýy, psıhıkalyq damýdyń baıaýlyǵy jáne basqa da dertke shaldyqqan balalar men eresek azamattar bar. Olardyń basym bóligi – «Teń múmkindikter álemi» qoǵamdyq qorynyń beıimdeý sport úıirmelerine qatysýshylar. Mundaı úıirmeler «Salamatty Qazaqstan» áleýmettik jobasy aıasynda elimiz boıynsha ashylǵan bolatyn.
Aıta ketsek, bochcha – doppen oınaıtyn saıys túri. Oǵan tirek-qımyl apparaty buzylǵan adamdar qatysady. 1984 jyly Paralımpıadalyq oıyndardyń baǵdarlamasyna qosylǵan. Qazaqstanda 2018 jyldan beri qolǵa alynyp, múgedektigi bar jandar, onyń ishinde balalar men jastar arasynda keńinen damyp keledi.
