Paralımpıadalyq bochchadan el chempıonatyna daıyndyq bastaldy
Búgin Astanadaǵy Paralımpıadalyq ortalyqta alǵashqy jattyǵý jıyny ótti. Parlament Senatynyń tóraǵasy – Qazaqstan bochcha federatsııasynyń Prezıdenti Máýlen Áshimbaev Ortalyqqa arnaıy baryp, erekshe qajettiligi bar jas sportshylarǵa qoldaý kórsetti.
Jattyqtyrýshylardyń aıtýynsha, sońǵy jyldary elimizde bochcha sport túri qarqyndy damyp, sonyń nátıjesinde sportshylar úshin jańa múmkindikter ashylyp jatyr.
Taıaýda Qazaqstan bochcha federatsııasy Boccia International Sports Federation – Halyqaralyq bochcha federatsııasynyń múshesi boldy. Soǵan baılanysty 6 sportshymyzdyń Polshada ótetin halyqaralyq chellendjerge qatysýyna ótinim berildi. Odan bólek, ulttyq quramamyzdyń 2023 jyldyń qazan aıynda Qytaıda ótetin Azııa Paralımpıada oıyndaryna jáne 2024 jyly Parıjde jalaýy jelbireıtin Paralımpıada oıyndaryna qatysýyna ótinim berý kózdelip otyr.
Sonymen qatar aldaǵy maýsym aıynda Astana qalasyndaǵy Jaqsylyq Úshkempirov atyndaǵy sport saraıynda tirek-qımyl apparaty buzylǵan sportshylar arasynda bochchadan Qazaqstan chempıonaty ótedi. Oǵan elimiz boıynsha 15 jáne odan joǵary jastaǵy 50-ge jýyq sportshy qatysady dep josparlanyp otyr.
Aıta keteıik, Senat tóraǵasy Máýlen Áshimbaev Qazaqstan bochcha federatsııasynyń kezekten tys konferentsııasynda Federatsııa Prezıdenti bolyp saılandy. Ol birneshe jyl boıy elimizde ınklıýzıvti sport túrleriniń damýyna qoldaý kórsetip, múgedektigi bar balalar men sportshylar úshin mundaı qadamnyń mańyzy zor ekenin aıtyp keledi.
ANYQTAMA: Bochcha – doppen oınaıtyn sporttyq oıyn. Oǵan tirek-qımyl apparaty buzylǵan adamdar qatysady. Atalǵan saıys túri 1984 jyly Paralımpıadalyq oıyndar baǵdarlamasyna engizilgen. Qazaqstanda alǵash ret 2018 jyly negizi qalanyp, qarqyndy damyp keledi. Qazirgi tańda bul sport múgedektigi bar azamattardyń, ásirese, balalar men jastardyń arasynda úlken qyzyǵýshylyqqa ıe.
