Paralımpıadalyq bochchadan el jeńimpazdary anyqtaldy
Astanada paralımpıadalyq bochcha kýbogynyń jeńimpazdaryn marapattaý sharasy ótti, dep habarlaıdy Kazinform.
Parlament Senatynyń Tóraǵasy, Qazaqstan bochcha federatsııasynyń Prezıdenti Máýlen Áshimbaev bochchadan el Kýbogy sarapqa salynǵan jarystyń jabylý rásimine qatysyp, jeńimpazdardy marapattady.
Sporttyq sharany saltanatty túrde Qazaqstan bochcha federatsııasynyń tóraǵasy Máýlen Áshimbaev ashty. Ol saıystyń joǵary deńgeıde ótkenin jáne erekshe sportshylardyń sheberligi men tabandylyǵyn aıryqsha atap ótti. Sondaı-aq ol Qazaqstan bochcha federatsııasynyń qyzmetin qorytyndylap, aldaǵy jumys josparyna toqtaldy.
«Aldymyzda aýqymdy mindetter tur. Kelesi jyly birqatar is-shara uıymdastyrýdy josparlap otyrmyz. Alǵash ret bochchadan ulttyq jasóspirimder quramasyn jasaqtaımyz. Federatsııa Týrızm jáne sport mınıstrliginiń jáne demeýshilerdiń qoldaýymen kelesi jyly el chempıonaty, respýblıka kýbogy, Sultanbek Orynbasarovty eske alýǵa arnalǵan ashyq týrnır sııaqty kem degende úsh iri respýblıkalyq jarys uıymdastyrýdy kózdep otyr. Odan bólek, ulttyq qurama birqatar halyqaralyq dodalarǵa qatysady», – dedi Máýlen Áshimbaev.
Aıta keteıik, bochchadan Qazaqstan Respýblıkasynyń kýbogy úshin jarys 8-9 jeltoqsan kúnderi elordada Jaqsylyq Úshkempirov atyndaǵy jekpe-jek saraıynda ótti. Onda elimizdiń 10 óńirinen kelgen 64 sportshy baq synady.
