Paralımpıada oıyndaryndaǵy sátti kórsetkishi úshin Natalıa Zvıagıntsevaǵa 300 myń teńge tabystaldy - Qaraǵandy
QARAǴANDY. QazAqparat - Qaraǵandy Halyqaralyq múgedekter kúni qarsańynda Qaraǵandy oblysy ákiminiń orynbasary Jandos Ábishev múmkindigi shekteýli sporshylarmen jáne qoǵamdyq birlestik ókilderimen kezdesti.
Júzdesý barysynda talqylanǵan basty taqyryp, oblysymyzdaǵy múgedek jandardy sportpen shuǵyldanýǵa tartý boldy, dep habarlaıdy óńir basshysynyń baspasóz qyzmeti.
Búgingi tańda Qaraǵandy oblysynda múmkindigi shekteýli 59 myń adam turyp jatyr, olardyń bar bolǵany 2,5 myńy ǵana turaqty túrde sportpen shuǵyldanady. Osyǵan qaramastan, qaraǵandylyq sportshylardyń túrli jarystarda mereıi ósip, jeńis tuǵyrynan kórinip júr. Dene shynyqtyrý jáne sport basqarmasynyń basshysy Natalıa Sýhorýkovanyń aıtýynsha, osy jyly qaraǵandylyq sportshylar 15 respýblıkalyq jarysqa qatysyp, 125 medal jeńip alǵan. Al halyqaralyq doda 7 jarysqa qatysqan sportshylar 6 medaldy qorjynǵa salǵan.
- Aǵymdaǵy jyldyń eń basty jetistigi, qozǵalys apparatyna zaqym kelgen bizdiń sportshymyz Zvıangıntseva Natalıanyń Rıo-de-Janeıro qalasynda ótken 15 Jazǵy Paralımpıada Oıyndaryna qatysýy. Bul dodaǵa álemniń 179 memleketinen 4350 múgedek-sportshy qatysty. Qazaqstannyń atynan 11 sportshy qatysty. Natalıa 100 m qashyqtyqty arqamen júrip ótýde 7 orynǵa taban tiredi. Medal sany boıynsha Qazaqstan 58 orynǵa turaqtady (1 - altyn, 1 - kúmis ), - dep atap ótti Natalıa Sýhorýkova.
Paralımpıada oıyndaryndaǵy sátti kórsetkishi úshin Natalıa Zvıagıntsevaǵa 300 myń teńgelik sertıfıkat tabystaldy. Natalıadan bólek, ákimdik basshylyǵy taekvando boıynsha álem chempıondary Aıan Abrash pen Valentına Antonenkony jáne Tynyq muhıttyq Azııa oıyndarynyń jeńimpazy Vıktor Frýndınge baǵaly syılyqtar berildi.
Kezdesý barysynda bılik organdarynyń aralasýyn talap etetin ózekti máseleler de kóterildi. Bul - sportshylardy kólikpen qamtamasyz etý jáne sporttyq jabdyqtardyń qoljetimdi bolýyna oń jaǵdaı jasaý, dárigerlik-áleýmettik mekemelerge sporttyq jabdyqtar bólý. Bul máselelerdi tyńdaǵan ákimniń orynbasary áleýmettik sala mamandaryna naqty tapsyrmalar júktedi.
- Sizderdi kele jatqan Tuńǵysh Prezıdent Kúni men Qazaqstan Táýelsizdiginiń 25 jyldyǵymen quttyqtaǵym keledi, oblysymyzdyń damýyna qosqan úlesterińiz úshin sizderge alǵys aıta otyryp, zor densaýlyq pen jeńis tileımin. Biz óz kezegimizde sizder úshin ońtaıly jaǵdaı qalyptastyrýǵa jumys isteımiz, - dep qortyndylady Jandos Ábishev.
