Paralımpıada qola júldegerine Petropavlda páter kilti men 5 mln teńge tabystaldy

PETROPAVL. QazAqparat – Soltústik Qazaqstan oblysynyń ákimi Qumar Aqsaqalov búgin Beıjińde ótken olımpıada jáne paralımpıada oıyndarynyń qatysýshylarymen kezdesti, dep habarlaıdy QazAqparat tilshisi.

Qumar Aqsaqalov kezdesýdiń basty keıipkeri, paralımpıada júldegeri Aleksandr Gerlıtske bir bólmeli páterdiń kiltin jáne 5 mln teńgeniń sertıfıkatyn tabys etti.

«Biz sportshylardyń jarysyn kórip, eleńdep otyrdyq. Aleksandr Gerlıts úmitimizdi aqtap, álemniń myqty sportshylarynyń biri ekenin dáleldedi. Olar Erbol Hamıtovpen birge komandalyq estafetada besinshi orynnan kórindi. Sizderge osy jeńisterińiz úshin alǵysymdy bildiremin, jas sportshylarǵa, qıyn jaǵdaıǵa tap bolǵan jandarǵa úlgi kórsettińizder», - dedi Qumar Aqsaqalov.

Olımpıada jáne paralımpıadaǵa qatysqan basqa sportshylar da marapatsyz qalmady. Olarǵa óńir basshysy qurmet gramotalaryn, alǵys hattardy jáne aqshalaı sertıfıkattar tabys etti.

Esterińizge salaıyq, Aleksandr Gerlıts Beıjińde ótken Paralımpıadada Qazaqstan qorjynyna jalǵyz medal salǵan edi. Ol parabıatlonnan synǵa túsip, úshinshi bolyp keldi. Budan basqa sportshy parabıatlon jáne parashańǵy jarysynda, estafetada úsh ret besinshi orynnan kórindi. Jalpy elimizden bul oıyndarǵa 5 sportshy qatysty.