Paralımpıada: Qazaqstandyq júzý sheberi Nurdáýlet Jumaǵalı qola júldeger atandy

NUR-SULTAN. QazAqparat – Tokıoda ótip jatqan Paralımpıadada qazaqstandyq Nurdáýlet Jumaǵalı júzýden qola júldeger atandy, dep habarlaıdy QazAqparat tilshisi.

Erler arasynda júzýden 100 m brass ádisimen S13 sanatynda ótken fınalda N.Jumaǵalımen birge taǵy bir qazaqstandyq Nuralı Sovetqanov jarys jolyna shyqty.

Báseke qorytyndysynda Nurdáýlet 1:05.20 nátıjesimen máreni úshinshi bolyp qıdy.

Álemdik rekord jasaǵan germanııalyq Talızo Engel (1:02.97) chempıon atansa, amerıkalyq Devıd Abrahams (1:04.38) kúmis júldege ıe boldy.

Nuralı segizinshi bolyp keldi (1:10.99).

Osylaısha Qazaqstan qorjynyna besinshi medal tústi.

Budan buryn Davıd Degtıarev paýerlıftıngten altyn alsa, Ánýar Sarıev, Temirjan Dáýlet jáne Zarına Baıbatına paradzıýdodan kúmis júldege ıe bolǵan edi.

Eske sala keteıik, budan buryn qos qazaqstandyqtyń fınalǵa shyqqanyn jazǵan bolatynbyz.