Paralımpıada chempıony Aleksandr Kolıadınge Qostanaıdan páter beriledi

QOSTANAI. QazAqparat - Phenchhandaǵy Paralımpıadada «altyn» medaldy jeńip alǵan Aleksandr Kolıadınge Qostanaıdan úı berilmek, dep habarlaıdy QazAqparat tilshisi.

Búgin oblys ákimdiginde ótken alqa májilisinde jumyspen qamtýdy úılestirý jáne áleýmettik baǵdarlamalar basqarmasynyń ótken jyly atqarǵan jumystary saralanyp, aldaǵy jylǵa esep berildi. Jıynda oblys ákimi Arhımed Muhambetov Paralımpıadada Qazaqstan quramasy sapynda abyroıly óner kórsetken Aleksandr Kolıadınge qurmet kórsetý kerektigin aıtty.

«Aleksandr Kolıadın el sportynyń tarıhyna altyn árippen endi. Ol - Paralımpıadadan «altyn» alǵan ázirge jalǵyz sportshy. Jerlesimizdiń osyndaı jetistigi basqa da múmkindigi shekteýli jandarǵa úlgi. Ol eki kúnnen soń Qostanaıǵa keledi. Onyń laıyqty kútip alyp, páter syılaımyz»,- dedi oblys ákimi.

Májiliste baıandama jasaǵan basqarma basshysy Gúlnár Ábenovanyń sózinshe, bıyl Kolıadınniń oń aıaǵyndaǵy protez aýystyrylady. Buǵan bıýdjetten 1,85 mln teńge qarjy bólinedi. Aıta keteıik, 2017 jyly dál osyndaı kómek qostanaılyq taǵy bir sportshy Kırıll Ostapenkoǵa da kórsetilgen edi.