Paralımpıada chempıony Aleksandr Kolıadın «Qurmet» ordenine ıe boldy
Osy jyl qostanaılyq sportshylar úshin nátıjeli boldy. Birqatar halyqaralyq, respýblıkalyq jarystarda jerlesterimiz chempıon atandy. Jyl boıy kózge túsken júırikter jyl aıryǵynda laıyqty marapatqa ıe boldy.
2018 jyldyń úzdik on sportshysynyń kóshin Qazaqstan tarıhyndaǵy qysqy Paralımpıada oıyndarynyń tuńǵysh chempıony Aleksandr Kolıadın bastady. Ol Phenchhandaǵy Paralımpıadada «altyn» júldeni jeńip aldy. Buǵan deıin 1994 jyly Lıllehammerdegi (Norvegııa) Paralımpıadada shańǵyshy Lıýbov Vorobeva kúmis medal alǵan edi.
Qostanaı oblysynyń ákimi Arhımed Muhambetov chempıonǵa «Qurmet» ordenin tapsyrdy. Oblys basshysy quttyqtaý sózinde 2018 jyldyń jetistikterin aıtyp, sport ınfraqurylymynyń damýyna toqtaldy.
«Bıyl memlekettik-jekemenshik áriptestik aıasynda 60-qa jýyq sport nysanyn paıdalanýǵa berdik. Kelesi jyly Jitiqara qalasynda taǵy bir sport kesheni salynady. Sonymen qatar, shańǵy bazasynyń qurylysy aıaqtalady. Oǵan 400 mln teńge qarajat bóldik», - dedi Arhımed Muhambetov.
Jyldyń úzdik sportshylarynyń qatarynda short-trekshi, halyqaralyq dárejedegi sport sheberi Anastasııa Krestova, shańǵyshylar - Denıs Kýzın, Vıtalıı Pýhkalo, Aıbek Baıdildınovter bar. Sondaı-aq, ziltemirshiler - Zalım Kývambaev pen Qabyl Tursynaı, kúres sheberleri - Veısal Eıýbov pen Margarıta Grıtsenkolar ozyq shyqty.
