Nurdáýlet Jumaǵalıǵa kólik pen páter syıǵa berildi
TARAZ. KAZINFORM — Jambyldyqtar Paralımpıadanyń kúmis júldegeri, QR eńbek sińirgen sport sheberi Nurdáýlet Jumaǵalıdy qoshemetpen qarsy aldy.
Aldymen parasportshyny jaqyndary men jankúıerleri Áýlıeata halyqaralyq áýejaıynan qushaq-qushaq gúl shoǵymen kútip alyp, jyly lebizin bildirdi.
Budan soń «Taraz-Arena» sport kesheninde saltanatty shara uıymdastyrylyp, oǵan Jambyl oblysynyń ákimi Erbol Qarashókeev qatysty.
Óńir basshysy júzý sheberin aıtýly jeńisimen quttyqtap, jambyldyqtardyń atynan alǵys aıtty.
— Tórtkúl dúnıe kóz tikken dúbirli dodada el mereıin eselep, qazaqstandyqtardyń senimin aqtadyń. Ásirese, Jambyl jurtynyń abyroıyn asqaqtattyń. Barsha jerlesteriń seni maqtan tutady. Álemniń eń basty sport saıysynda kúshti erik-jiger men tabandylyq tanytyp, naǵyz er azamatqa tán minez kórsettiń. Rekord jańarttyń. Sen naǵyz batyrsyń! Búginde Paralımpıada oıyndarynyń eki dúrkin júldegeri atynyp, aıtýly jetistikke jettiń. Olımpıada chempıony Eldos Smetovtiń jeńisti jolyn laıyqty jalǵaı beresiń dep senemiz. 2028 jyly ótetin Paralımpıada oıyndarynda altynnan alqa taǵyp, Ánuranymyzdy asqaqtatyp, kók týymyzdy kókte jelbiretýińe tilektespin! — dedi oblys ákimi.
Nurdáýlet Jumaǵalıǵa jazǵy Paralımpıadadaǵy joǵary kórsetkishi úshin demeýshilerdiń tarapynan 2 bólmeli páter men Toyota Camry 75 avtokóliginiń kilti tabystaldy.
Jeke jattyqtyrýshysy Sattar Beısembaevqa da iltıpat kórsetilip, Haval M6 avtokóligi berildi.
— Sizderdiń qoldaýyńyz ben jyly sózderińiz jeńiske jetýime yqpal etti. Jankúıer bolǵan barshańyzǵa alǵysym sheksiz! Aldaǵy ýaqytta da baıraqty básekelerde top jaryp, el senimin aqtaı beremin, — dedi Nurdáýlet Jumaǵalı.
Aıta keteıik, XVIІ jazǵy Paralımpıada oıyndaryna 4 jambyldyq sportshy el namysyn qorǵap, tartysty oıyn órnegin kórsetti. Onyń ishinde Nurdáýlet Jumaǵalı men Zýlfııa Gabıdýllına (parajúzý), Ómiráli Nyshan (parataekvondo) jáne Saltanat Ábilhasymqyzy (para jeńil atletıka) bar.
