Paralımpıada chempıony Erbol Hamıtov qansha syıaqy alady

ASTANA. KAZINFORM - Qazaqstandyq Erbol Hamıtovtiń Paralımpıada altyny jáne qola medalin alǵannan keıin memleket tarapynan qansha kólemde syıaqy alatyny belgili boldy.

Qazaqstandyq Erbol Hamıtov dúbirli doda barysynda qazirge deıin bir altyn jáne bir qola medal alyp úlgerdi. Ol búgin para bıatlonnan 4,5 shaqyrymdyq iz kesý jarysynda (otyryp jarysý sanaty) jeńistiń eń bıik tuǵyryna kóterildi.

Oǵan deıin 10 naýryzda para shańǵy jarysynan 1500 metrge klassıkalyq sprınt jarysynda qola medal jeńip aldy.

Elimizde Olımpıada jáne Paralımpıadanyń altyn medali úshin 250 myń dollar (shamamen 123,7 mıllıon teńge) kóleminde syıaqy belgilengen.

Al kúmis medal - 150 myń dollar berilse, qola medal -75 myń dollarǵa baǵalanady. Sondaı-aq, 4-oryn alǵan sportshy 30 myń dollar alsa, 5-orynǵa 10 myń dollar qarastyrylǵan.

Qazir Qazaqstan quramasy medaldar kestesinde 1 altyn jáne 1 qola medalmen 18-orynǵa jaıǵasty.

Bul kestede Qytaı 33 (12 altyn, 9 kúmis, 12 qola) kósh basynda tursa, odan keıingi oryndardaǵy AQSh-tyń 19 (9-5-5), Italııanyń 14 (6-7-1) medali bar.