Paralımpıada chempıony Davıd Dıgtıarev jańa páter jáne 25 mln teńgeniń aqshalaı sertıfıkatyna ıe boldy
KÓKShETAÝ. QazAqparat - Aqmola oblysynyń ákimi Marat Ahmetjanov Parıj qalasynda ótken Olımpıada jáne Paralımpıada oıyndarynda top jarǵan jáne qatysqan sportshylardy saltanatty túrde marapattady.
Jıynda sóz sóılegen aımaq basshysy Marat Ahmetjanov sportshylardy jáne jattyqtyrýshylardy tórt jylda bir keletin baıraqty jarysta jetken jetistikterimen quttyqtady.
«Sizderdiń jeńisterińiz - batyldyq pen sheksiz adamı múmkindikterdiń aıqyn kórinisi. Ol kóp jylǵy eńbektiń, erik-jigerdiń jáne ómirlik qıyndyqtardan bas tartpaý qabiletiniń nátıjesi. Memleket osy mańyzdy salaǵa jan-jaqty qoldaý kórsetedi. Prezıdent Qasym-Jomart Toqaev Olımpıada oıyndaryna qatysýshylarmen kezdesýde sport salasyndaǵy negizgi mindetter men basymdyqtardy tujyrymdady. Bolashaqta biz alǵa qoıǵan maqsattarǵa jetý úshin jumys isteıtin bolamyz. Qazaqstandyq sporttyń bolashaǵy sizderdiń árqaısylaryńyzǵa baılanysty», - dedi Marat Ahmetjanov.
Saltanatty sharada aımaq basshysy Paralımpıadanyń eki dúrkin chempıony Davıd Degtıarevke 3 bólmeli páterge jáne aqshalaı syıaqyǵa, kúmis medal ıegeri Erkin Ǵabbasovqa 2 bólmeli páterge jáne aqshalaı syıaqyǵa sertıfıkattar tabys etti. Al olardyń jattyqtyrýshylar ıÝrıı Kolesnıkov pen Múslim Sársembekovke aqshalaı sertıfıkat berildi. Sonymen birge, qyzdar arasynda Olımpıadaǵa qatysqan Karına Ibragımova men onyń jattyqtyrýshysy Aleksandr Vysotskıı baǵaly syılyqqa ıe boldy. Óz kezeginde sportshylar kórsetilgen qoldaýǵa alǵys aıtyp, joǵary jetistikterge jetýge ýáde berdi.
«Osynshama qoldaý bildirip otyrǵan jankúıerlerime, týǵan-týystaryma jáne oblys basshylyǵyna shynaıy alǵysymdy bildiremin. Jeńis tuǵyrynan kórinip kele jatqanymyz sizderdiń qoldaýlaryńyzdyń arqasynda, senimderińizdi aldaǵy ýaqytta da aqtaýǵa tyrysamyz», - dep alǵysyn bildirdi Paralımpıadanyń eki dúrkin chempıony Davıd Degtıarev.
Aıta ketsek, Davıd Degtıarev Parıjde ótken Paralımpıada oıyndarynda paýerlıftıngten 54 kelige deıingi sanattaǵylar arasynda chempıon atanǵan bolatyn. Al Erkin Ǵabbasov 10 metr qashyqtyqqa pnevmatıkalyq myltyqtan oq atýdan jarystyń fınalynda kúmis medal jeńip aldy.
