Paralımpıada-2024: Búgin Qazaqstan quramasynan kimder saıysqa túsedi

ASTANA. KAZINFORM - Búgin, 2 qyrkúıekte Parıjde ótip jatqan 2024 jylǵy Paralımpıada oıyndarynda qazaqstandyq sportshylar bir saıys túrinen jarys jolyna shyǵady.

Saǵat 15:00-de otyryp oınaý voleıbolynan Qazaqstan quramasy Egıpetpen sheberlik baıqasady.

Qazaqstandyq qurama budan buryn Frantsııany 3:0 esebimen jeńse, odan keıin Bosnııa jáne Gertsogovınaǵa 2:3 esebimen jol berdi.

Al Egıpet quramasy Bosnııa jáne Gertsogovınaǵa 1:3 esebimen jeńilse, Frantsııany 3:0 esebimen tize búktirdi.

Qazir atalǵan topta Bosnııa jáne Gertsogovına kósh bastap, alǵashqy joldamaǵa ıe boldy. Ekinshi joldama taǵdyry Qazaqstan men Egıpet kezdesýinde sheshiledi.

Qazaqstan quramasynyń sportshylary Parıj Paralımpıadasyna sporttyń 9 túrinen 33 lıtsenzııa jeńip aldy.

Dúbirli doda 28 tamyz ben 8 qyrkúıek aralyǵynda ótedi.

Eske salsaq, Qazaqstan para sportshylary buǵan deıin Paralımpıada oıyndarynda 2 altyn, 4 kúmis, 1 qola medaldy oljalaǵan bolatyn.