Paralımpıada-2022: Qazaqstan atynan shyqqan 2 sportshy qandaı nátıjege qol jetkizdi

NUR-SULTAN. QazAqparat - Qytaı astanasy Beıjiń qalasynda 2022 jylǵy XIII qysqy Paralımpıada oıyndarynda para bıatlonnan otyryp syrǵanaýda búgin 2 sportshy el namysyn qorǵady, dep habarlaıdy QazAqparat tilshisi.

Sportshylar parabıatlonnan 10 shaqyrymǵa otyryp syrǵanaýda jarys jolyna shyqty. El quramasynan atalǵan saıysqa Sergeı Ýsoltsev pen Erbol Hamıtov jarys jolyna shyqty.

Báseke barysynda altyn medaldy qytaılyq Lıý Mentao enshiledi. Odan keıingi oryndardy germanııalyq Martın Flıaıg pen ýkraınalyq Taras Rad ózara bólisti.

Al qazaqstandyq Sergeı Ýsoltsev máre syzyǵyn 14-shi bolyp qıdy. Ol jarys jeńimpazynan +5:15.4 kórsetkishimen qalyp qoıdy. Al Erbol Hamıtov 16-oryndy mise tutty. Erbol altyn medal ıesinen +5:12.1 ýaqytqa kesh keldi.

Endi taǵy bir qazaqstandyq Aleksandr Gerlıts para bıatlonnan 10 shaqyrymǵa turyp syrǵanaýda jarys jolyna shyǵady.

Qysqy Paralımpıada 4 jáne 13 naýryz aralyǵynda ótkiziledi. Onda álemniń 50 memleketinen kelgen 700-ge tarta sportshy baq synaýda. Qazaqstan atynan barǵan 5 parasportshy sporttyń eki túrinen jarysqa qatysýda.