Paralımpıada-2018: Qazaqstandyq Aleksandr Gerlıts «qolaǵa» bir qadam jetpeı qaldy
ASTANA. QazAqparat - Koreıanyń Phenchhan qalasyndaǵy Paralımpıada-2018-de qazaqstandyq shańǵyshy Aleksandr Gerlıts 47:54.4 mınýt nátıjesimen tórtinshi oryn aldy, dep habarlaıdy «SPORTINFORM» SAA.
Aleksandr Gerlıtske qola medalge 43 sekýnd jetpeı qaldy. Soǵan qaramastan, qazaqstandyq shańǵyshy Qazaqstan shańǵy jarysynyń tarıhyndaǵy erler-paralımpıadashylar arasynda úzdik atandy.
«Búgin qazaqstandyq paralımpıadashylar úshin mańyzdy kún. 1994 jyldan beri shańǵy jarysynan jáne bıatlonnan Qazaqstan quramasynyń qorjynynda bir de bir medal men joǵary nátıje bolmaǵan. Araǵa 24 jyl salyp, bizdiń sportshylar joǵary nátıjege qol jetkizdi: bizdiń Aleksandr Gerlıtsti norvegııalyq sportshy nebári 40 sekýndqa basyp ozdy», - dep pikir bildirdi QR Ulttyq Paralımpıada komıtetiniń baspasóz hatshysy Gúlnár Djeılan.
Aıta keteıik, qazaqstandyq paralımpıadashylar úshin syıaqy mólsheri tek medalǵa qarastyrylmaǵan. Soltústik qazaqstandyq Aleksandr Gerlıts 4-shi oryn úshin 30 myń AQSh dollarǵa, onyń jattyqtyrýshysy Vasılıı Kolomıets de 30 000 dollarǵa ıe bolady.
