Paraqorlyq barlyq deńgeıdegi əkimdikte órship tur - Arman Berdalın
«Sybaılas jemqorlyq faktileri eń kóp tirkeletin organ barlyq deńgeıdegi ákimdikter bolyp otyr (213), odan keıingi oryndarda ishki ister organdary (176) men Memlekettik kirister komıteti (43) keledi. Táýekel joǵary salalar qatarynda qurylys (187), bilim berý (138), aýyl sharýashylyǵy (135), TKSh (131) jáne jer qatynastary (108) salalary bar. Qostanaı jáne Shyǵys Qazaqstan oblystarynda ádilet organynyń úsh ókili áshkerelendi. Qazir olarǵa qatysty sotqa deıingi tergep-tekserý júrip jatyr», - dedi Agenttiktiń qoǵammen baılanys jónindegi departamentiniń dırektory Arman Berdalın.
Onyń aıtýynsha, 2018 jyldyń basynan beri 35 ákim jáne olardyń orynbasarlary qylmystyq jaýapqa tartylyp otyr. Sonyń bireýi oblystyq, altaýy aýdandyq, beseýi qalalyq deńgeıdegi, qalǵan 23-i aýyl ákimdiginiń ókilderi.
«Ústimizdegi jyldyń 10 aıynda Ulttyq bıýro Sotqa deıingi tergep-tekserýlerdiń biryńǵaı tizilimine 2 361 qylmystyq quqyqbuzýshylyqty tirkegen. Sonyń 1 726-sy, ıaǵnı 73 paıyzy sybaılas jemqorlyqqa qatysty. Sybaılas jemqorlyq qylmystarynyń jartysynan astamy paraqorlyq 57% (1726-nyń 979-y), úshten biri qarjy jymqyrý - 29% (1726-nyń 506-sy). Sotqa óndiristegi 5 789 qylmystyq istiń 2 136-sy nemese 37 paıyzy jiberildi. Jalpy zalaldyń kólemi 14,4 mlrd etip belgilengen bolsa, sonyń 12,8 mlrd teńgesi, ıaǵnı 89 paıyzy qaıtaryldy. Kúdiktilerdiń jalpy somasy 42,7 mlrd teńge bolatyn (sybaılas jemqorlyq boıynsha 4,2 mlrd teńge) múlki qamaýǵa alyndy», - dedi ol.
Jalpy, sybaılas jemqorlyq jasady degen kúdikpen 1 126 laýazymdy tulǵa jaýapqa tartylyp otyr, sonyń 20-sy respýblıkalyq, 75-i oblystyq, 128-i qalalyq jáne aýdandyq deńgeıdegi sheneýnikter.