Paraqorlyq: Ekvadordyń eks-prezıdenti otbasy, baýyrlarymen qosa sottaldy
ASTANA. KAZINFORM – Ekvadordyń burynǵy prezıdenti Lenın Moreno qytaılyq kompanııadan para alǵany úshin bes jylǵa bas bostandyǵynan aıyryldy, dep habarlaıdy Euronews.
73 jastaǵy Moreno sot úkimin jarııalaý kezinde zalda boldy. Densaýlyǵyna baılanysty júrip-turýy qıyndaǵandyqtan, ol jazasyn úıqamaqta óteıdi. Eks-prezıdent Rafael Korrea bıligi tusynda vıtse-prezıdent qyzmetin atqarǵan kezde jemqorlyq shemasyna tikeleı qatysqany úshin kináli dep tanyldy.
Tergeý málimetinshe, Moreno qytaılyq kompanııaǵa sý elektr stantsııasyn salý jónindegi kelisimshartty alýǵa kómekteskeni úshin para alǵan.
Onyń áıeli men qyzy, eki aǵasy jáne qaıyn aǵasy da qylmysqa qatysýshy dep tanyldy. Morenonyń áıeli men qyzy 30 aıdan bas bostandyǵynan aıyryldy. Sottalǵandar 90 kún ishinde zańsyz alǵan qarajatynan úsh ese kóp somany qaıtarýǵa tıis.
Osylaısha, Moreno jemqorlyq úshin sottalǵan Ekvadordyń úshinshi burynǵy prezıdenti atandy. Buǵan deıin Rafael Korrea 2020 jyly paraqorlyq isi boıynsha segiz jylǵa sottalǵan. Ol birneshe jyldan beri Belgııada turady. Eks-prezıdent Hamıl Maýad ta 2014 jyly memlekettik qarajatty maqsatsyz paıdalanǵany úshin segiz jylǵa bas bostandyǵynan aıyrylǵan.
Prokýratýranyń málimetinshe, 2008-2018 jyldary elde qytaılyq Sinohydro kompanııasy júzege asyrǵan jobanyń qunynan 4% kóleminde para jınaǵan jemqorlyq jelisi jumys istegen. Qarajat ulttyq jáne halyqaralyq tranzaktsııalar arqyly memlekettik qyzmetkerler men basqa da tulǵalarǵa bólingen. Olardyń arasynda Moreno da bolǵan.
Sinohydro 2010 jyly quny shamamen 2 mlrd dollar bolatyn «Koka-Kodo-Sınkler» sý elektr stantsııasynyń qurylysyn bastady. Nysan 2016 jyly Ekvadorǵa berilgenimen, keıin onyń qurylysyndaǵy aqaýlar synǵa ushyrady.
Moreno 2007 jyly Rafael Korrea úkimetinde vıtse-prezıdent bolyp, 2013 jylǵa deıin osy qyzmetti atqardy. 2017 jyly prezıdent saılaýynda jeńiske jetip, Ekvadordy basqardy.
Eske sala ketsek, 2017 jyly Ekvadorda vıtse-prezıdent para alǵany úshin alty jylǵa sottalǵan edi.
Al 2023 jyly Ekvador parlamenti eks-prezıdent Gılermo Lassony jemqor dep tanydy.
Al byltyr kóktemde Perýdiń burynǵy prezıdenti men onyń áıeli 15 jylǵa bas bostandyǵynan aıyrylǵanyn jazdyq. Sol jyly qarasha aıynda Perýdiń taǵy bir eks-prezıdenti Vıskarra 14 jylǵa sottaldy.
