Paraqorlardyń bıýdjetke tólegen eń úlken aıyppuldary jarııa boldy
Aıta keteıik, 2015 jyldyń 1 qańtarynan bastap kúshine engen jańa Qylmystyq Kodekstiń 312-babynda «Para alý» faktisi boıynsha, azamat aıyppul tólep, temir tordan qutylý múmkindigi qarastyrylǵan. Aıyppul kólemi alynǵan paranyń 50 eselengen mólsheri. Mysaly, 100 myń teńge kólemindegi para alsa, 5 mln. etip memleket qazynasyna qaıtarady. Ony tóleı almaıtyn jaǵdaıda, bas bostandyǵynan aırylady. Eger para iri kólemde aldyn ala kelisilgen toptyń bopsalaýy arqyly berilse, onda 70 eselengen aıyppul tóleý mindetteledi. Nemese 7 jyldan 12 jylǵa deıin qamaý kózdelgen.
«2016 jyldyń 6 aıynda sybaılas jemqorlyq sanatyndaǵy baptarmen aıyptalǵan 152 tulǵaǵa qatysty sot úkimimen aıyppul salynyp, onyń jalpy mólsheri 654 mln. teńgeni qurady, onyń Іshinde para somasynyń eselengen túrinde aıyppul tóleý jazasy 130 adamǵa qatysty kesilgen», - delingen S.Perovtyń agenttik tilshisine bergen jaýabynda.
Departament basshysynyń aıtýyna qaraǵanda, 2015 jyly 320 tulǵaǵa qatysty 2 mlrd. teńgege teń aıyppul jazasy salynǵan, onyń ishinde paranyń eselengen túrinde 238 adamǵa qatysty aıyppul tóleý jazasy kesilgen.
«2015 jyly sot úkimimen aıyppul retinde tólengen eń úlken soma - 1,1 mlrd. teńge bolǵan, ol para alý faktisi boıynsha, Tabıǵı monopolııalardy retteý agenttiginiń burynǵy tóraǵasy Murat Ospanovqa qatysty salyndy, al 2016 jyldyń birinshi jartyjyldyǵynda eń úlken aıyppuldy Atyraý oblysy Jylyoı ákimdiginiń Turǵyn úı-kommýnaldyq sharýashylyq, jolaýshylar kóligi jáne avtomobıl joldary bóliminiń basshysy A.Ábenov para berý faktisi boıynsha tóledi. Oǵan salynǵan aıyppul kólemi - 48 mln. teńgeni qurady», - delingen hatta.
Eske sala keteıik, Murat Ospanov ómiriniń sońyna deıin memlekettik qyzmette laýazymǵa ıe bolý quqyǵynan aıyrylǵan bolatyn. Oǵan tıesili múliktiń barlyǵy tárkilenedi. Onyń isin qaraǵan sýdıa Erbol Rahymbekov Qazaqstan Prezıdentine Murat Ospanovty "Qurmet" ordeni memlekettik marapatynan aıyrý týraly usynys keltirý qajettigin de atap ótken bolatyn.
Tabıǵı monopolııalardy retteý agenttiginiń burynǵy tóraǵasy Murat Ospanov "Atyraý Jaryq" AQ úshin elektr qýatyn berý men taratý tarıfin bekitýde deldal arqyly bopsalaý jolymen asa iri kólemde para alǵan dep aıyptaldy. Para bergeni úshin sotta "Atyraý Jaryq" AQ múddesine qyzmet etken kásipker Arman Aqtaı jaýap berdi, ol sheneýnikke para berýge májbúr bolǵanyn aıtty. Sottyń sheshimimen Arman Aqtaı qylmystyq jaýapkershilikten bosatyldy.
A.Ábenov Jylyoı aýdany turǵyn úı-kommýnaldyq sharýashylyq, jolaýshylar kóligi jáne avtomobıl joldary bólimi» memlekettik mekemesiniń basshysy bolyp jumys jasady. Óziniń qaryndasyna memlekettik satyp alýlarda konkýrsta jeńip shyǵýy úshin kómektesý maqsatynda ol Atyraý oblysy memlekettik satyp alýlar basqarmasynyń memlekettik satyp alýlar jáne monıtorıng bóliminiń bas mamany K.Muhtarovqa 1 600 000 teńge somasynda para berdi. Ábenov QR QK 2-bólimi 367-babynda kózdelgen qylmysty jasaýǵa aıypty dep tanyldy. Oǵan 48 000 000 teńge mólsherinde aıyppul túrinde jaza taǵaıyndaldy jáne ómir boıy memlekettik qyzmet laýazymyna quqyqtarynan aıyryldy.