Parakanoıster Taıkenov pen Baltabaeva Azııa chempıonatynda júldeger atandy
ASTANA. QazAqparat - Qazaqstandyq sportshylar Jalǵas Taıkenov pen Jańyl Baltabaeva parakanoe boıynsha Azııa chempıonatynyń júldegerleri atandy, dep habarlaıdy «QazAqparat» HAA tilshisi.
19 jastaǵy Jalǵas Taıkenov 200 metrge júzýde KL3 kategorııasynda kúmis júlde aldy. Almatylyq Jańyl Baltabaeva qola medalǵa ıe boldy.
Eske sala ketsek, Jalǵas bala kezden óte belsendi bolǵan. Biraq, jol-kólik apatynan bes jasynda sol aıaǵynan aıyrylǵan. «Qaısar» klýby men Astana sport basqarmasy 2013 jyly ótken strıt vorkaýt festıvalinde atbasarlyq jigitke nazar aýdardy. Al 2014 jyldyń tamyz aıynda Jalǵas álem chempıonatyna qatysty. Qazirgi ýaqytta Jalǵas Taıkenov eskek esý sporty anaǵurlym damyǵan Ońtústik Qazaqstan oblysynyń atynan jarysqa qatysyp júr.
Jańyl Baltaba Taraz qalasynda dúnıege kelgen, 26 jasta. Jańyl sol aıaqsyz týǵan jáne eki qolynda birneshe saýsaq joq. Sportshy bala kezinde dene kemistiginen qurdastarynyń mazaǵyna qalǵanyn eske alady. Biraq, Jańyl 13 jasqa tolǵanda óz ómirin túbegeıli ózgertti. Júzý úıirmesine jazylyp, jeńil atletıkamen aınalysty. Al 2013 jyldyń qazan aıynda shańǵy tebe bastady. 2014 jyly Sochıdegi qysqy paralımpıada oıyndaryna qatysty. Jarty jyl buryn eskek esýmen aınalysa bastady.
