Paragvaıdyń eks-prezıdenti 15 jylǵa sottalýy múmkin
ASTANA. KAZINFORM — Paragvaıdyń burynǵy prezıdenti Santıago Penıa Ueno Bank-tegi alaıaqtyq isine baılanysty senimdi teris paıdalandy jáne jeke bas paıdasyn kózdedi degen kúdikke ilindi, dep habarlaıdy Xinhua.
11 qarashada prokýratýra Ueno Bank-tegi qarjy jymqyrý isiniń tergelý barysy týraly baspasóz máslıhatyn ótkizdi. Bul iske Ortalyq banktiń burynǵy basshysy Karlos Karvalonyń da qatysy bar.
– Qazirgi ýaqytta prokýratýrada bankti taratý kezinde qylmystyq sóz baılasýǵa bardy dep Penıaǵa aıyp taǵýǵa jetkilikti dálel joq. Mundaı aıyp taǵylsa, onyń túrmedegi jazasy uzartylýy múmkin, – dedi Ekonomıkalyq qylmystar men sybaılas jemqorlyqqa qarsy kúres jónindegi mamandandyrylǵan bólimshe (UDEA) prokýrory Veronıka Valdes.
Valdestiń aıtýynsha, taǵylǵan aıyptar boıynsha Penıa 15 jylǵa deıin bas bostandyǵynan aıyrylýy múmkin.
Paragvaı prokýratýrasy Ueno Bank-tegi qarjy jymqyrý isin tergeý kezinde burynǵy prezıdent Santıago Penıanyń sheteldegi aktıvterin anyqtap, buǵattaý úshin halyqaralyq baılanys ornatty.
Atap aıtqanda, Eýropa prokýratýrasy men basqa da mekemelerden alynǵan málimetter negizinde Lıýksembýrgke resmı sot tapsyrmasy jiberildi. Onyń maqsaty – keıin tárkilenýi múmkin aktıvterdiń saqtalýyn qamtamasyz etý.
Budan bólek prokýratýra Eýroodaqtyń qylmystyq ádilet salasyndaǵy yntymaqtastyq agenttigi – Eýroıýst pen Eýropa prokýratýrasyna suraý joldap, Aktıvterdi qaıtarý jónindegi halyqaralyq ortalyqpen baılanys ornatty.
Sondaı-aq aıyptaý tarapy sheteldegi zańsyz jolmen alynǵan aktıvter men qarajatty izdeý, anyqtaý jáne buǵattaý jumystaryn jedeldetý úshin Latyn Amerıkasynyń Aktıvterdi qaıtarý jelisine júgindi.
Eske salsaq, 5 qarashada Santıago Penıa otstavkaǵa ketetinin málimdedi. Bul sheshim Ueno bankiniń kúıreýinen keıingi bank daǵdarysyna baılanysty qabyldandy. Bank jumysyn toqtatyp, eldiń Ortalyq bankiniń basqarýyna ótti.
Bank qyzmetiniń toqtaýyna baılanysty úsh mıllıonǵa jýyq klıent óz jınaǵyna qol jetkize almady. Bul búkil elde narazylyq týǵyzyp, sherýge shyqqandar prezıdent Santıago Penıanyń otstavkaǵa ketýin talap etti. Ol 2025 jylǵa deıin bank ıesi bolǵan toptyń aktsıonerleriniń biri edi.
Buǵan deıin otstavkaǵa ketpek bolǵan Paragvaı prezıdentine ımpıchment jarııalanǵanyn habarlaǵan bolatynbyz.
