Paragvaı prezıdenti bank daǵdarysy men jappaı narazylyqtan keıin otstavkaǵa ketti
ASTANA. KAZINFORM – Paragvaı prezıdenti Santıago Penıa eldegi bank daǵdarysy men jappaı narazylyqtar aıasynda qyzmetinen ketetinin málimdedi. Ol bul sheshimin áleýmettik jelide jarııalaǵan beıneúndeýinde jetkizdi, dep habarlaıdy BBC.
Prezıdenttiń otstavkaǵa ketýine eldegi iri qarjy uıymdarynyń biri Ueno Bank-tiń kúıreýinen týyndaǵan daǵdarys sebep boldy.
Bank jumysyn toqtatyp, Paragvaı Ortalyq bankiniń basqarýyna ótken. Sonyń saldarynan úsh mıllıonǵa jýyq klıent jınaq aqshasyna qol jetkize almaı qaldy.
Bul jaǵdaı el kóleminde jappaı narazylyqqa ulasty. Sherýge shyqqandar prezıdenttiń otstavkaǵa ketýin talap etti. Santıago Penıa 2025 jylǵa deıin atalǵan bankke ıelik etken toptyń aktsıonerleriniń biri bolǵan.
– Eger qandaı da bir sátte halyqtyń úmitin aqtaı almasam, keshirim suraǵym keledi. Maǵan bildirgen senimderińizge qııanat jasaý eshqashan oıymda bolǵan emes, – dedi Santıago Penıa.
Ol eldegi turaqtylyqty, qoǵamdyq tynyshtyq pen demokratııalyq ınstıtýttardy saqtaý úshin qyzmetinen ketý týraly sheshim qabyldaǵanyn aıtty. Sonymen qatar óz tarapynan qandaı da bir zańsyz áreket jasalǵany jónindegi aıyptaýlardy joqqa shyǵardy.
Buǵan deıin Paragvaı Kongresiniń tómengi palatasy prezıdentke ımpıchment jarııalaý rásimin bastaýǵa daýys bergen. Onyń qyzmetinen ketýin ózi múshe bolǵan partııanyń depýtattary da qoldaǵan.
Penıaǵa múddeler qaqtyǵysyna jol berdi jáne Ueno Bank-tiń kúıreýine qatysty derekterdi jasyrdy degen aıyp taǵylyp otyr.
Endi memleket basshysy qyzmetin vıtse-prezıdent Pedro Alıana atqarady.
Ueno Bank málimetinshe, onyń úsh mıllıonǵa jýyq klıenti bar. Bul Paragvaıdaǵy eresek turǵyndardyń shamamen 60 paıyzyna teń. Bankte azamattardyń zeınetaqy jınaqtary men memlekettik qarajattyń bir bóligi saqtalǵan.
Apta basynda bank qyzmetiniń toqtaýy mıllıondaǵan adamnyń esepshottaryna qol jetkizýin shektedi.
Santıago Penıa 2023 jyly bıliktegi konservatıvtik «Kolorado» partııasynan prezıdent bolyp saılanǵan edi.
Aıta keteıik, buǵan deıin Perýde úkimetke qarsy narazylyqtar aıasynda tótenshe jaǵdaı jarııalaý týraly sheshim qabyldanǵan bolatyn. Elde prezıdenttik bılik pen Kongress arasyndaǵy kelispeýshilikter birneshe ret saıası daǵdarysqa ulasqan.
