Parafıeva jol apatynda qalaı eki aıaǵynan aıyrylǵandyǵyn aıtyp berdi
ALMATY. QazAqparat - Almatyda eki aıaǵynan aırylǵan Ekaterına Parafıevanyń isi boıynsha sot protsesi bastaldy. Sot aldynda avtobýs júrgizýshisi Jańabaev Dəýren jaýap berýde, dep habarlaıdy QazAqparat tilshisi sot zalynan.
Avtobýs júrgizýshisine QR QK 345-babynyń 2-bólimi boıynsha adam densaýlyǵyna úlken zalal keltirgen jol apatyna əkelgen jol erejesin buzdy degen aıyp taǵyldy.
Jańabaevtyń qorǵaýshysy Seıdalıev Baqytjan tergeý barysynda Ekaterına Parafıevanyń is-əreketi durys tergelmegenin, sol úshin qaıta jiberýdi ótindi.
Aıyptalýshy Jańabaev óz kinəsin moıyndamady.
Sot barysynda Ekaterına Parafıeva oqıǵanyń qalaı bolǵanyn aıtyp berdi.
«16 maýsymda tús kezinde qurbymmen Əl-Farabı kóshesinde batysqa qaraı kele jattyq. Aýa raıy ashyq, jolda kólik bolmady. Prezıdent parkine jete bere ashyq lıýkti kórdim. Jyldamdyqty azaıtyp aınalyp ótpek boldym. Sol kezde kóligim shaıqalyp ketti. Dóńgelek jarylǵanyn baıqadym. Syrtqa shyǵyp júksalǵyshtan belgi almaqshy bolǵanda ózime ushyp kele jatqan Kamrıdi baıqadym. Sodan qulap qaldym»,- dedi E. Parafıeva.
Sonymen qatar kýəgerler Abdýalıev, Sızov jaýap berdi.
Eske sala keteıik, E. Parafıeva 16 maýsymda Almaty qalasyndaǵy ál-Farabı dańǵylynda bolǵan jol apatynan japa shekken bolatyn. Honda CRV kóligin tizgindegen qyzdar ashyq lıýkke kirip ketip, kólik dóńgelegin jaryp alǵan. Sodan jol shetine toqtap, syrtqa shyǵyp, kólikterin qarap jatqan kezde ortańǵy jolaqta kele jatqan Toyota Camry mashınasyn avtobýs soqqan. Qatty soqqydan Toyota Camry kóliginiń artqy bóligi ushyp kelip Honda CRV kóligine tıgen. Saldarynan qyzdar ortada qysylyp qalyp, bireýi eki aıaǵynan aıyrylǵan bolatyn.
Qazir Katıa belgili erikti, jattyqtyrýshy Kıra Ýdartsevanyń kómegimen ońaltý sharalarynan ótip jatyr. Endi ol arnaıy jattyǵýlardyń arqasynda protez kııýge daıyndalmaq.
Kelinshek qaıyrymdylyq sharalaryna, qoǵamdyq jumystarǵa belsendi aralasýdy bastady. Ol múmkindigi shekteýli jandarǵa barynsha úmit syılap, kúresýge keńes berip keledi. Ekaterına qazir jattyǵý zalyna baryp júr.
