Paradtyń eń kórikti qatysýshylary - áıel áskerılerden quralǵan sherý toby júrip ótti
ASTANA. QazAqparat - Astanada «Qazaq Eli» monýmenti alańynda QR Prezıdenti - Joǵarǵy Bas Qolbasshy Nursultan Nazarbaevtyń qatysýymen Otan qorǵaýshylar kúnine jáne Uly Otan soǵysyndaǵy Jeńistiń 70 jyldyǵyna arnalǵan áskerı parad jalǵasýda. Sharanyń birinshi bóliminde jeke quramnyń sherý toptary alańdy boılaı ótip jatyr.
Alańǵa Teńiz jaıaý áskerleri gvardııalyq brıgadasynyń rotasy shyqty. Bul brıgadaǵa elimiz úshin mańyzdy Kaspıı mańy óńiriniń qaýipsizdigin qamtamasyz etý jónindegi mindet júktelgen.
Saltanatty sharany «Qazbrıg» bitimgerlik brıgadasy jalǵastyrdy. Ol BUU standarttary boıynsha qurylǵan. Bitimgerlik bólim kelisimshart boıynsha áskerı qyzmetshilerden jasaqtalǵan. Olar - óz isiniń qas sheberleri.
Alańnan erekshe jaýyngerlik kıim kıgen arnaıy maqsattaǵy bólimsheler sarbazdary ótýde. Tájirıbe kórsetkendeı, qazirgi zamanǵy qarýly qaqtyǵystarda quramy jaǵynan shaǵyn, alaıda utqyr bólimsheler basty ról atqarady.
Sherýdiń eń kórikti qatysýshylary - áıel áskerılerden quralǵan sherý toby ótýde. Olar Álııa men Mánshúkteı qazaqtyń batyr qyzdarynyń izin jalǵastyryp keledi. Búgingi tańda áskerı qyzmetterin abyroımen atqaryp júr.
Alańnan QR Tuńǵysh Prezıdenti atyndaǵy Ulttyq qorǵanys ýnıversıteti ofıtserleriniń paradtyq sapy júrip ótti. Búginge deıin atalǵan ýnıversıtette 1000-ǵa jýyq ofıtser daıarlanyp shyqty.
Qurlyq áskerleri Áskerı ınstıtýtynyń kýrsanttarynyń rotasy taıap keledi. Osynaý áskerı oqý ornynyń paradtyq esep toby jaqynda Máskeýdiń Qyzyl alańynda Uly Jeńis qurmetine arnalǵan paradqa qatysatynyn erekshe atap ótý kerek.
Paradty Radıoelektronıka jáne baılanys áskerı-ınjenerlik ınstıtýtynyń kýrsanttary jalǵastyrdy. Bul Ortalyq Azııa óńirindegi avtomattandyrylǵan basqarý júıesi men baılanys salasynda mamandar daıarlaıtyn jalǵyz oqý orny.
