Paradan bas tartqan almatylyq ekologtyń qyzmeti ósetin boldy
ASTANA. QazAqparat - 75 mıllıon teńge paradan bas tartqan Almaty qalalyq ekologııa departamentiniń qyzmetkeri marapattalyp, qyzmeti ósetin boldy.
Bul týraly Ortalyq kommýnıkatsııalar qyzmetinde ótken brıfıngte QR Ekologııa, geologııa jáne tabıǵı resýrstar mınıstrligi Ekologııalyq retteý jáne baqylaý komıtetiniń tóraǵasy Zulfýhar Joldasov málim etti, dep habarlaıdy QazAqparat tilshisi.
Komıtet tóraǵasy 75 mıllıon teńge paradan bas tartqan Almaty qalasy boıynsha ekologııa departamentiniń qyzmetkerin kótermeleý týraly suraqqa jaýap berdi.
Onyń aıtýynsha, bul ekologııa qyzmetkeriniń sybaılas jemqorlyqqa qarsy kózqarasyn kórsetýdiń aıryqsha faktisi boldy, atap aıtqanda, metallýrgııa kompanııasy qyzmetindegi buzýshylyqtar úshin mıllıardtaǵan aıyppuldy alyp tastaýǵa 75 mln teńge kóleminde para usynǵan.
«Ótken jyly biz FBSh baǵdarlamasy boıynsha jalaqyny eki esege arttyrdyq (faktorlyq-baldyq jalaqy shkalasy – «QazAqparat»). Syılyqaqylardy únemi josparlaımyz. Bolashaqta jalaqy áli de kóteriledi dep oılaımyn. Árıne, basqa da yntalandyrý tetikteri bar, mamandardy oqytý kerek, sybaılas jemqorlyq kórinisteri men faktilerdi boldyrmaý úshin tekserýlerdi avtomattandyrý boıynsha jaqsy ádister qajet», – dedi Zulfýhar Joldasov.
Komıtet Tóraǵasy sondaı-aq paradan bas tartqan qyzmetkerge syılyqaqy berilgenin jáne laýazymy joǵarylaýy múmkin ekenin aıtty. Onyń basshylyq laýazymǵa taǵaıyndalýy basqa aımaqtarda qarastyrylýy múmkin.
Sondaı-aq Zulfýhar Joldasov basqarmada merıtokratııa qaǵıdaty boıynsha basshylyq qyzmetke taǵaıyndaý tájirıbesi júrgiziletinin atap ótti. Sońǵy úsh jylda basqarma basshylary men olardyń orynbasarlary laýazymdaryna tómengi laýazymdardan 25 adam taǵaıyndaldy.
Jýyrda qazaqstandyq BAQ-ta habarlanǵandaı, «QazFerroStal» kompanııasynyń qyzmetkerleri Almaty qalalyq ekologııa departamentiniń qyzmetkerine 75 mıllıon teńge kóleminde para bermek bolǵan.
