Parad alańyna kýrsanttar bettedi
ASTANA. KAZINFORM — Astanadaǵy áskerı parad asa mańyzdy áskerı oqý oryndarynyń áleýetin kórsetetin toptardyń sherýimen jalǵasyp jatyr.
Radıoelektronıka jáne baılanys áskerı-ınjenerlik ınstıtýtynyń saltanatty eseptobyn ınstıtýt bastyǵy general-maıor Nurtas Qabaqov bastap shyqty. Bul oqý orny Ortalyq Azııa boıynsha áýe shabýylyna qarsy qorǵanys, baılanys jáne radıoelektrondyq kúres áskerleriniń mamandaryna arnalǵan birden-bir ınstıtýt bolyp esepteledi. Munda baılanys bólimderiniń, zenıttik, zymyrandyq jáne radıotehnıkalyq áskerdiń quramy, áskerı avıatsııany radıotehnıkalyq qamtamasyz etýshiler, ásker men qarý-jaraqty avtomattandyrylǵan júıe arqyly basqaratyn mamandardy daıyndaıdy. Olardyń izin ala Shoqan Ýálıhanov atyndaǵy áskerı kolledjdiń saltanatty eseptoby ótip barady. Saptyń basynda áskerı kolledj bastyǵy polkovnık Aıbek Ǵabdrahov.
Elimizde kásibı serjanttardy daıarlaý 1996 jyly qolǵa alynǵan bolatyn. Áskerdiń jaýyngerlik sheberligi, bólimshelerdegi áskerı tártip, jeke quramnyń moraldyq-jaýyngerlik rýhy kóbinese serjanttyń kásibıligine baılanysty. Bul oqý ornynyń mańyzdylyǵy da osynda. Kýrsanttar sherýin Ulttyq qaýipsizdik komıteti Shekara akademııasynyń órenderi túıindedi. Bul arnaıy oqý orny UQK-den basqa da kúsh qurylymdaryna ofıtser daıyndaıdy.
Aıta ketý kerek, búgingi áskerı sherýge 4 myńnan astam áskerı qyzmetshi, 200-den astam áskerı tehnıka, 66 ushý apparaty tartylǵan.
Sondaı-aq, paradta bıyl satyp alǵan sý jańa Airbus A-400 áskerı-kólik ushaǵy alǵash ret qatysyp otyr. Armııalyq Mı-17, Mı-171Sh, Mı-35 jáne kóliktik S-295, Tý-154M, L-410 ushaqtary, Sý-30SM, Sý-25 joıǵysh ushaqtary, L-39 oqý-jaýyngerlik ushaǵynyń ekıpajdary sherýdiń aıbynyna áýeden aıbyn qosýda.