Para voleıboldan álem chempıonaty: Qazaqstan quramasy Brazılııaǵa ese jiberdi
ASTANA. KAZINFORM — Qytaıdyń Hanchjoý qalasynda voleıboldy otyryp oınaýdan álem chempıonatynda Qazaqstan quramasy S tobynda ekinshi kezdesýin ótkizdi.
Baýyrjan Tahaýovtyń shákirtteri bul joly álemdegi úzdikterdiń biri — Brazılııa quramasymen sheberlik baıqasty.
Birinshi partııada brazılııalyqtar basym boldy — 25:20.
Ekinshi sette Perdebaı Namuratov, Erik Qasqabaev, Baýyrjan Sartaev, Erlan Bıtemirov, Erbolat Altaev syndy qazaqstandyqtar sátti oıyn órnegin kórsetti — 26:24.
Qazaqstandyq paravoleıbolshylar úshinshi sette de bastapqyda alǵa shyqqanymen, sol basymdylyqty ustap tura almady — 17:25. Brazılııalyqtar tórtinshi partııada alǵa tym uzap ketip, matchty jeńispen aıaqtady — 25:15.
Qorytyndy esep — 3:1, Brazılııanyń paıdasynda.
Erteń Qazaqstan quramasy Irakpen alańǵa shyǵady. Irakty jeńgen jaǵdaıda shırek fınalǵa joldama alady.
Eske sala keteıik, budan buryn qazaqstandyq paravoleıbolshylardyń álem chempıonatynda baq synaıtynyn jazǵan edik.
Sondaı-aq qazaqstandyq paravoleıbolshylar álem chempıonatyn aıqyn jeńispen bastady.
