Para surap sottalǵan Atyraý ákiminiń burynǵy orynbasary apellıatsııalyq shaǵym berdi

ATYRAÝ. QazAqparat – Atyraýda sottalǵan burynǵy sheneýnikterdiń advokattarynan apellıatsııalyq shaǵym tústi. Sot otyrysy 2 tamyzda ótedi, dep habarlaıdy QazAqparat.

Budan buryn Atyraý oblysy ákiminiń burynǵy birinshi orynbasary 10 jylǵa sottalǵanyn habarlaǵan edik.

Oblystyq sottyń baspasóz qyzmetinen málim etkendeı, sot úkimimen kelispegen advokattar men qoǵamdyq qorǵaýshy apellıatsııalyq shaǵym bergen.

Al, prokýror apellıatsııalyq ótinishhat keltirgen.

«Nurlan Taýbaev pen Tımýr Basarovqa qatysty qylmystyq is Atyraý oblystyq sotynyń qylmystyq ister jónindegi sot alqasyna tústi. Sot otyrysy 2 tamyzda jergilikti ýaqytpen saǵat 10:00-ge taǵaıyndaldy», -dep habarlady oblystyq sottyń baspasóz qyzmeti.

2020 jyldyń shilde aıynda Atyraý oblysynyń ákimdigi Jylyoı aýdanyndaǵy Qulsary qalasynda aýrýhana salý týraly sheshim qabyldaǵan.

Qurylys jumystaryn «BKK» JShS oryndaǵan.

«Sottalýshy Nurlan Taýbaev oblys ákiminiń orynbasary bola tura jáne qurylys salasyna jetekshilik ete otyryp, «BKK» JShS dırektorynyń orynbasarynan kelisimshart somasynyń 10% mólsherinde para talap etken. Keıin sottalýshy Tımýr Basarovtyń (qurylys basqarmasynyń basshysy) qatysýymen para somasy 7%a, 185 500 000 teńge mólsherinde kelisilgen. Nurlan Taýbaev sottalýshy Tımýr Basarovqa aqsha qarajatyn alyp kelýdi tapsyrǵan. Sodan keıin Tımýr Basarov jábirlenýshiden 185 730 004 teńge (423 900 AQSh dollary jáne 5 000 000 teńge) mólsherinde para alǵan. Para berý barysynda Tımýr Basarovty sybaılas jemqorlyqqa qarsy agenttiktiń qyzmetkerleri ustaǵan», -dep málim etken edi oblystyq sottyń baspasóz qyzmeti.

Sot sottalýshy Nurlan Taýbaevty QR Qylmystyq kodeksiniń 24-babynyń 3-bóligi, 366-babynyń 4-bóligimen (memlekettik qyzmetti atqaratyn laýazymdy adamnyń qorqytyp alý jolymen adamdar tobynyń aldyn ala sóz baılasýymen asa iri mólsherde para alýǵa oqtalýy), Tımýr Basarovty Qylmystyq kodekstiń 28-babynyń 5-bóligi, 24-babynyń 3-bóligi, 366-babynyń 4-bóligimen (atalǵan is-áreketterge kómektesý) kináli dep tanydy.

Sot úkimimen Nurlan Taýbaevqa 10 jyl bas bostandyǵynan aıyrý jazasy taǵaıyndaldy.

Sottalýshy Tımýr Basarovqa jazany aýyrlatatyn mán-jaıdyń joqtyǵy eskerile otyryp, QR Qylmystyq kodeksiniń 55-babynyń 4-bóligi qoldanylyp, 5 jyl bas bostandyǵynan aıyrý jazasy taǵaıyndaldy.

Eki sottalýshy da ómir boıy memlekettik qyzmette jumys isteý quqyǵynan aıyrylǵan bolatyn.