Para shabandozdar Azııa chempıonatynda 6 medal jeńip aldy

ASTANA. KAZINFORM — Saýd Arabııasynda ótip jatqan shossedegi para velosporttan Azııa chempıonatynyń alǵashqy jarys kúninde elimizdiń sportshylary 1 altyn, 4 kúmis jáne 1 qola medal enshiledi, dep habarlaıdy Sport jáne dene shynyqtyrý isteri komıtetiniń baspasóz qyzmeti.

26,8 km qashyqtyqtaǵy V klasy boıynsha erler arasyndaǵy tandemdik jekeleı synda Kırıll Ilıýkevıch (stoker) pen Gleb Brýssenskıı (pılot) 00:33:04 nátıjesimen márege ekinshi bolyp jetse, Naıl Ermuhanbet (stoker) pen Rýslan Álıev (pılot) 00:34:22 ýaqytpen úshinshi oryndy ıelendi. Al birinshi oryndy 00:32:50 nátıjesimen Ońtústik Koreıa quramasy jeńip aldy.

Áıelder arasyndaǵy tandemdik jarysta Juldyz Qaınarova (stoker) men Anjela Soloveva (pılot) 26,8 km qashyqtyqty 00:38:48 ýaqytta júrip ótip, márege birinshi bolyp keldi. 00:40:34 nátıjesimen Anastasııa Kalaýs (stoker) pen Polına Bratchıkova (pılot) ekinshi oryn aldy. Al úshinshi bolyp máre syzyǵyn Taıland sportshylary kesti (00:43:16).

Osy qashyqtyqtaǵy jekeleı synda S4 klasynda qazaqstandyq Pavel Babenko 00:43:45 nátıjesimen ekinshi bolyp keldi. Birinshi oryndy 00:38:11 ýaqytpen BAÁ sportshysy ıelense, 00:45:55 nátıjesimen ózbekstandyq sportshy úshinshi orynǵa taban tiredi.

H2 klasyndaǵy jekeleı synda otandasymyz Berik Qartbaı kúmis júldeger atandy. Bul — Qazaqstan tarıhyndaǵy H klasyndaǵy (handcycle) Azııa chempıonatyndaǵy alǵashqy júlde. Handcycle — sportshylar qolmen aınaldyratyn arnaıy úsh dóńgelekti velosıpedpen trassada óner kórsetetin paralımpıadalyq sport túri. Mundaı jarystar tirek-qımyl apparaty zaqymdanǵan sportshylar arasynda shossede nemese trekte uıymdastyrylady.

Aıta ketsek, shossedegi para velosporttan Azııa chempıonaty Saýd Arabııasynyń Ál-Kassım aımaǵynda ótýde. Jarysqa 10 elden 50-den astam sportshy qatysýda. 13 aqpanda Qazaqstan quramasy toptyq synda baq synaıdy.

Osyǵan deıin Qazaqstan quramasy 2026/27 jylǵy UEFA Ulttar lıgasynda kimdermen oınaıtynyn jazǵanbyz.