Kólik dóńgelekterin para retinde alǵan: Arqalyqta polıtsııa qyzmetkeri men jergilikti turǵyn sottaldy
ARQALYQ. KAZINFORM — Sot materıaldaryna sáıkes, patrýldik polıtsııa qyzmetkeri júrgizýshi kýáliginen aıyrylǵan kólik júrgizýshisine «qamqorlyq» kórsetip, odan para retinde tórt jazǵy dóńgelek alǵan. Sottalǵandarǵa birneshe mıllıon teńge kóleminde aıyppul salyndy.
Arqalyq qalalyq soty qylmystyq isti qysqartylǵan tártipte qarady. Sot materıaldaryna sáıkes, jol-patrýldik polıtsııa qyzmetkeri 126 myń teńge turatyn avtokólik shınalaryn para retinde alǵan.
Buǵan deıin Arqalyq turǵyny mas kúıinde kólik júrgizgeni úshin kináli dep tanylyp, 7 jylǵa kólik basqarý quqyǵynan aıyrylǵan. Keıin ol kólikti tabys tabý jáne qala ishinde júrý úshin qajet ekenin aıtyp, polıtsııa qyzmetkerinen kómek suraǵan.
Іs materıaldaryna sáıkes, tártip saqshysy bastapqyda bas tartqanymen, keıin jańa dóńgelekter ákelýdi talap etken. Júrgizýshi byltyr 7 sáýirde bank arqyly bólip tóleý rásimdep, tórt jazǵy shına satyp alyp, olardy polıtsııa qyzmetkerine bergen.
Odan keıin polıtseı kólik sýretin jiberýdi surap, ony WhatsApp messendjerindegi patrýldik polıtsııa qyzmetkerleri bar toptyq chatqa joldaǵan. Sot dereginshe, bul chatqa toqtatylmaıtyn kólikterdiń sýretteri jiberilip otyrǵan.
Sot 2025 jylǵy sáýir–qazan aralyǵynda júrgizýshi kólik júrgizý quqyǵynan aıyrylǵanyna qaramastan, polıtseıdiń «qamqorlyǵymen» Arqalyqta erkin júrgenin anyqtady.
Tintý barysynda polıtseıdiń úıinen 11 oq-dári tabyldy. Saraptama qorytyndysyna sáıkes, olardyń 10-y Makarov jáne Stechkın tapanshalaryna arnalǵan 9 mm oq, bireýi 12 kalıbrli ańshylyq patron bolǵan jáne bári jaramdy dep tanyldy.
Eki sottalýshy da kinásin tolyq moıyndap, ókinish bildirdi. Sot jeńildetetin jaǵdaılar retinde kináni moıyndaý, ókiný jáne kámeletke tolmaǵan balalarynyń baryn eskerdi. Nátıjesinde burynǵy polıtsııa qyzmetkeri para alǵany jáne zańsyz oq-dári saqtaǵany úshin kináli dep tanyldy. Ol memlekettik qyzmette ómir boıy jumys isteý quqyǵynan jáne polıtsııa kapıtany ataǵynan aıyryldy. Sondaı-aq oǵan 4 mln teńge aıyppul salyndy.
Ekinshi aıyptalýshy para bergeni úshin kináli dep tanylyp, 1,89 mln teńge aıyppul tóleýge jáne zańsyz alynǵan múlikti — tórt dóńgelekti memleket kirisine ótkizýge mindetteldi.
Úkimge apellıatsııalyq shaǵym túsirýge bolady.
Aıta keteıik, Atyraýda polıtsııa basqarmasynyń burynǵy basshysyna qatysty qylmystyq is qozǵaldy.
