Para retinde kreslo alǵan aqmolalyq polıtseıge sot úkimi shyqty

KÓKShETAÝ. QazAqparat - Para retinde kreslo alǵan Aqmola oblystyq jergilikti polıtsııa qyzmetiniń jol-patrýldik polıtsııasy batalony komandıriniń burynǵy orynbasaryna 2 mıllıon teńgeden astam aıyppul salyndy. Bul týraly Kókshetaý qalalyq sotynan málim etti, dep habarlaıdy QazAqparat tilshisi.

Sot sheshimine sáıkes, 2019 jyldyń aqpanynda Aqmola oblystyq jergilikti polıtsııa qyzmetiniń jol-patrýldik polıtsııasy batalony komandıriniń burynǵy orynbasaryna tanysy júginip, aǵasynyń júrgizýshi kýáligin qalpyna keltirýdi suraǵan. Eks-polıtseı aǵasy kólikti tıisti kýáliksiz júrgize bere alatynyn, polıtsııa qyzmetkerleri toqtatqan jaǵdaıda máseleni qyzmettik jaǵdaıyn paıdalana otyryp sheshetinin aıtqan. Tártip saqshysy bul úshin júgingen er adamnan keńse kreslosyn syılaýdy talap etken.

Arada birneshe kún ótkende eks-polıtseı para retinde suraǵan 67 563 teńgeniń keńse kreslosyn alady, keıin alǵan zatymen ustalady.

Sot aıyptalýshyny QR QK-niń 366-baby 2-bóligi boıynsha kináli dep tanyp, alǵan parasynyń somasynan 30 ese kóp, ıaǵnı 2 026 890 teńge kóleminde aıyppul tóleýge mindettedi. Sondaı-aq ol ómir boıyna memlekettik qyzmette isteý quqynan aıyryldy.

Sot úkim shyǵarý kezinde aıyptalýshynyń óz kinásin moıyndaýyn, ókinýin, buryn sotty bolmaǵanyn, mekenjaıy jáne jumys isteıtin ornynan alǵan minezdemesi jaqsy bolýyn eskerdi. Sonymen qatar, protsessýaldyq kelisim jasaý kezinde aıyptalýshy aıyppul túrindegi jaza taǵaıyndaýǵa kelisti. Aıyptalýshy «polıtsııa maıory» arnaıy ataǵynan aıyryldy. Sot úkimi zańdy kúshine engen joq.

Avtory Oksana Matasova