Para dzıýdodan álem chempıonatynda qazaqstandyq balýandar taǵy eki qola aldy

ASTANA. KAZINFORM – Astana qalasynda ótip jatqan para dzıýdodan Álem chempıonatynda el quramasy qorjynyna taǵy eki qola tústi.

Qazaqstandyq Erǵalı Shameı (81 keli) J1 sanaty boıynsha ol 3-oryn úshin beldesýde taǵy bir otandasymyz Baýyrjan Arstanbekovpen kúresýi tıis edi. Biraq qarsylasy tatamıge shyǵýdan bas tartty. Osyǵan baılanysty jeńis Erǵalıǵa berildi.

Sondaı-aq J2 sanaty boıynsha Parıj Paralımpıadasynyń qola júldegeri Daıana Fedosova (60 keli) 3-oryn úshin ótken kezdesýde Brazılııa sportshysy Marııa Dos Santos Lınsty taza jeńdi.

Aıta ketsek, budan buryn el quramasynan Aınaz Kýralova (46 keli) qola júlde aldy.

Al qola júlde úshin beldesýde Alfııa Tlekqabyl (52 keli), J1 sanaty boıynsha Asylan Nurdáýletov (70 keli), Temirbolat Tashekenov (70 keli) 3-oryn úshin kezdesýde qarsylastaryna ese jiberip, úzdik úshtikten kórine alǵan joq.

Endi el quramasynan J2 sanaty boıynsha 81 kelidegi Ǵalymjan Smaǵululy fınalda ózge otandasymyz Beksultan Qulmyrzamen chempıondyq ataqty sarapqa salady.

Jahandyq dodada 10 salmaqta júlde jıyntyǵy sarapqa salynady. Erler 70, 81, 95, 95 keliden joǵary salmaqta beldesse, áıelder 52, 60, 70, 70 keliden joǵary salmaqta júldege talasady.
Qazirge deıin qazaqstandyq Aınaz Kýralova (46 keli) qola júlde aldy.